Të gjithë trenat dhe autobusët e natës në Cyrih, duke filluar nga korriku do të lëvizin përsëri në linjat e tyre.
Pas pezullimit që ishte vendosur për shkak të koronës, autobusët dhe trenat lokalë e regjionalë (S-Bahn) do të vihen në funksion nga 2 korriku, raporton srf.ch.
Siç dihet, rrjeti i natës është pezulluar që nga marsi i vitit 2020 për shkak të pandemisë së COVID-19.
Tani, falë relaksimit të kushteve të pandemisë, zhvillohen më shumë aktivitete gjatë fundjavave.
Për këtë arsye kjo ofertë që është konceptuar vetëm për netët e fundjavës, gjegjësisht të premten dhe të shtunën, u vihet sërish në dispozicion qytetarëve, ka njoftuar Zürcher Verkehrsverbund (ZVV).
Këta trena dhe autobusë qarkullojnë, duke filluar nga ora 1 e pas mesnatës në çdo orë, deri në fillimin e orarit normal, të ditës. Ata bartin në të dy drejtimet, udhëtarët nga qyteti i Cyrihut që duan të udhëtojnë në qytetet tjera të Kantonit dhe në disa qytete që kufizohen me këtë kanton.
Sipas njoftimit, rifillimi i trenave dhe autobusëve të natës koordinohet në të gjithë vendin. Për këtë arsye nuk është i mundur një fillim më i hershëm sepse nevojitet planifikimi operacional.
Udhëtarët e natës i pret dhe një risi e këndshme: ata nuk kanë nevojë të paguajnë shtesën në rrjetin ZVV, e cila kushtonte 5 franga.
Kjo shtesë, qysh verën e kaluar qe vendosur të shfuqizohej duke filluar nga dhjetori i vitit 2020, transmeton albinfo.ch. Mirëpo, për shkak të pezullimit të rrjetit të natës, ky vendim nuk pati arritur të hynte në fuqi. Koncepti i mbrojtjes për gjithë transportin publik vlen edhe për rrjetin e natës, thekson më tej ZVV.
