Vullnetari i parë i shëndetshëm ka marrë një “dozë të vogël” të një vaksine potenciale kundër Covid-19 të zhvilluar nga studiues të Kolegjit Imperial të Londrës.
Pjesëmarrësi, i cili ka kërkuar të mbetet anonim, raportohet se është në gjendje të mirë shëndetësore. Ai raportohet se e kishte marrë vaksinën më 19 qershor, shkruajnë mediet e huaja, transmeton lajmi.net.
Një dozë e dytë përforcuese do të pasojë brenda katër javësh.
Testimet njerëzore për vaksinën e Oksfordit ChAdOx1 nCoV-19 (AZD1222) filluan në prill, në të cilën u përfshinë më shumë se 1.000 pjesëmarrës.
Profesori Robin Shattock, nga departamenti i sëmundjes infektive në Imperial, i cili po udhëheq studimin, tha se puna e ekipit të tij është “një hap i rëndësishëm” drejt gjetjes së një kure.
“Tani presim me padurim rekrutim të shpejtë në testime, në mënyrë që të mund të vlerësojmë si sigurinë e vaksinës, ashtu edhe aftësinë e saj për të prodhuar antitrupa neutralizues”, deklaroi Shattock.
Pesëmbëdhjetë vullnetarë të shëndetshëm pritet të marrin dozën e parë në ditët në vijim, si pjesë e fazës fillestare të testimit.
