Zëvendëskryeministri i parë i Qeverisë dhe ministri për sistem politik dhe marrëdhënie mes bashkësive, Artan Grubi, në panelin me temë: “Pajtimi dhe demokracia di katalizator i ndryshimit në Ballkan” që u mbajt të enjeten në Strugë në suaza të edicionit të tretë të Forumit të Prespës për dialog me titull “Familje e zgjeruar evropiane deri në vitin 2030: një mision (i pa)i mundur?”, në fjalën e tij foli edhe për aktualitetin politik në vend, ndryshimet kushtetuese dhe rrugëtimin e Maqedonisë së Veriut drejt BE-së.
Sipas tij, problemi i opozitës maqedonase nuk është me futjen e komunitetit bullgar në Kushtetutë, por ka të bëjë me kalkulime për zgjedhje të parakohshme parlamentare.
“Pamë, dëgjuam, lexuam se VMRO nuk ka problem me ndryshimin kushtetues, nuk ka problem me përfshirjen e bullgarëve në kushtetutë, që nuk kërkon zgjedhje të hershme, që nuk merr parasysh deklaratat e tyre të nënshkruara noteriale, por gjithçka që dëshirojnë është që shqiptarët dhe BDI të largohen nga Qeveria! Është koha të realizojmë atë që e kemi premtuar! Prandaj, nuk jam i bindur se pajtimi në kuptimin e fjalorit është zgjidhja, çfarë na duhet vërtet është një “ristartim” i gjeneratës dhe të themi ‘mjaft’ është ‘mjaft’, nuk na duhet një pajtim pasi nuk e kemi arritur atë me shekuj, por na duhet një gjeneratë, dhe liderë, që vendosin thjesht të shkojnë përpara, të ecin përpara, të përqafojnë vlerat perëndimore, ta bëjnë të gjithë këtë para se të largohemi të gjithë nga ky vend, dhe të zëvendësohemi nga dikush tjetër që ende duhet të pajtohet në ciklin e pafund”, tha Grubi i cili në mënyrë ironike shtroi pyetjen, duke aluduar në liderin e VMRO-së,Mickoskin: A ka ndonjë dëshirë tjetër që “xhindi” mund t’i plotësojë “Aladinit” tonë?
Ai potencoi se ndryshimi në Ballkan fillon kur e shohim kutinë e votimit si llogarinë tonë të kursimeve dhe jo si një bankomat. (Indeks.mk)
