Stevço Jakimovski ka keqpërdorur detyrën e tij publike duke ndërhyrë në procese publike, të cilat ndër të tjera i referohen prokurimeve publike dhe planifikimit urban, për përfitime personale dhe për të mirën e bashkëpunëtorëve të tij, tha shërbimi për shtyp i shtetit për Zërin e Amerikës në maqedonisht. Departamentit, në kërkesën për të komentuar deklaratën e Jakimovskit se vendimi i SHBA-së për ta vendosur në listën e zezë është “ndërhyrje e shërbimeve të huaja inteligjente në zgjedhjen e presidentit të shtetit”.
“Seksioni 7031(c) parashikon që zyrtarët e qeverive të huaja, për të cilët Sekretari i Shtetit ka informacion të besueshëm për përfshirje të drejtpërdrejtë ose të tërthortë në korrupsion të konsiderueshëm ose shkelje të rënda të të drejtave të njeriut, nuk kanë të drejtë të hyjnë në Shtetet e Bashkuara,” tha Departamenti i Shtetit.
Postin e Sekretarit të Shtetit të SHBA-së tash e mban Anthony Blinken.
Dje, Shtetet e Bashkuara të Amerikës sanksionuan kryetarin e Komunës së Karposhit dhe kandidatin për president Jakimovski, si dhe ish-prokuroren publike speciale Katica Janeva, së bashku me anëtarët e familjeve të tyre të afërta, për përfshirje në akte korruptive, cenim të sundimit të ligjit dhe besimit publik në institucionet demokratike.
Ata janë të ndaluar të hyjnë në Shtetet e Bashkuara.
“Veprime si këto janë në përputhje me prioritetin e administratës për të luftuar korrupsionin në nivel global.”
SHBA ka njoftuar se do të vazhdojë të përdorë të gjitha mjetet në dispozicion për të luftuar korrupsionin dhe për të promovuar respektimin e të drejtave të njeriut në Maqedoninë e Veriut dhe në Ballkanin Perëndimor në tërësi.
“Përcaktimet publike sipas kompetencave të tilla si Seksioni 7031(c) nxisin llogaridhënien për zyrtarët qeveritarë që përfshihen në korrupsion ose kryejnë shkelje të rënda të të drejtave të njeriut, parandalojnë abuzimin në të ardhmen dhe luftojnë mosndëshkimin,” i tha Departamentit të Shtetit Zërit të Amerikës për Maqedoninë.
Jakimovski ka paralajmëruar kallëzim penal kundër një autori të panjohur për ndërhyrje në punët e brendshme.
Janeva, nga ana tjetër, është duke vuajtur dënimin me shtatë vjet burg për rastin “Reket” nga korriku i vitit 2021.
Për shkak të përfshirjes së tyre në korrupsion të madh, Shtetet e Bashkuara gjatë dy viteve të fundit kanë sanksionuar ish-zëvendëskryeministrin Koço Angjushev, kryetarin e komunës së Strugës Ramis Merko, Ratka Kamçeva, Sergej dhe Irina Samsoneko dhe kompanitë, Orce Kamçev, ish-kryeministrin Nikola Gruevski dhe ish drejtori i Administratës për siguri dhe kundërzbulim Sasho Mijalkov.
Në fillim të mandatit të tij, presidenti Joe Biden lëshoi një urdhër ekzekutiv, sipas të cilit, personat që janë drejtpërdrejt ose indirekt përgjegjës për minimin e proceseve apo institucioneve demokratike në Ballkanin Perëndimor, përfshirë korrupsionin dhe shkeljet e të drejtave të njeriut, do të futen në listën e zezë.
Sipas ndryshimeve të propozuara në Ligjin për Masat Kufizuese, megjithatë, aktet ligjore të Shteteve të Bashkuara dhe Mbretërisë së Bashkuar do të jenë një bazë e vlefshme për vendosjen e personave apo kompanive në listën e sanksioneve vendore.
