Sipas të dhënave të publikuara nga VMRO-DPMNE opozitare, gjysmë milioni euro për një mandat katërvjeçar ose 11.500 euro në muaj është paga më e lartë që është paralajmëruar në kuadër të aferës së ashtuquajtur “Parazit”. Fjala është për Nikolla Ljushevin, i emëruar nga Qeveria në Bordin e Drejtorëve të “Telekomit”, i cili sipas llogaritjeve të partisë opozitare, në një mandat do të arkëtojë 560.000 euro me pagë mujore prej 713 mijë denarë.
I dyti në listën e publikuar sot nga VMRO-DPMNE është Tomislav Tuntev, drejtor i Agjencisë së Aviacionit Civil, i cili merr pagë prej 203.000 denarë në muaj, transmeton Zëri i Amerikës.
Tuntevi nuk është drejtor në Gjermani apo në ndonjë vend tjetër të zhvilluar, ai është zyrtar i emëruar nga qeveria maqedonase. Publiku as e pa Tuntevin pas largimit nga posti i deputetit dhe as nuk dëgjoi për punën e tij. Paga e tij është 3300 euro në muaj. Në Maqedoni, ku njerëzit nuk ushqehen dot, dhe ai merr 40 mijë euro pagë vjetore. Dhe për një mandat do të mbledhë 160.000 euro”, tha Ivica Tomovski, anëtar i KQ të VMRO-DPMNE-së.
Një nga zyrtarët në listë është edhe drejtori i PUIK-ut, Zoran Gjorgjiev, me pagë mujore prej 105 mijë denarë, i cili gjatë mandatit të tij do të fitojë 84 mijë euro.
“Ljupço Zikov, analist qeveritar në detyrë, dhe në parim zyrtar i emëruar nga MEPSO, merr 80.000 denarë në muaj, që janë 960.000 denarë ose 16.000 euro për një vit. Gjatë një mandati nga kjo kompani energjetike do të arkëtojë 54 mijë euro”, tha Tomovski.
Kryeministri Kovaçevski pranoi se ka mospërputhje në pagat e zyrtarëve shtetërorë dhe paralajmëroi përgatitjen e ligjit për ruajtjen e konsistencës në paga, veçanërisht për zyrtarët qeveritarë.
“Duhet të ketë një ligj që do të sjellë rregull dhe konsistencë në të ardhurat e drejtuesve sidomos. Dhe për këtë kam propozuar dhe është duke u hartuar një ligj për pagat, me të cilin do të përcaktohet paga më e lartë në vend dhe të gjitha pagat pastaj do të unifikohen në bazë të asaj paga më të lartë, pra të vendosen në një kornizë konsistente”, tha kryeministri Kovaçevski.
Ligji do të duhet të hartohet nga Ministria e Shoqërisë Informative dhe Administratës, por do të ishte një proces i gjerë dhe afatgjatë.
VMRO – DPMNE dje i shpalli pagat e dy drejtorëve në M-NAV, të cilat variojnë nga 266 deri në 345 mijë denarë.
