www.telegrami.mk
koment me bazë politike po ok
Drejtori i Spitalit Klinik të Tetovës thotë se Bilall Kasami dhe Izet Mexhiti nuk ishin aty si bashkëkryetarë të VLEN-it, por si kryetarë komunash.
Mirë. Por atëherë lind një pyetje shumë e thjeshtë: çfarë lidhje institucionale kishte kryetari i Komunës së Çairit me një ceremoni punësimi në Spitalin Klinik të Tetovës?
Çairi nuk është Tetovë. Nuk është Tearcë. Nuk është Bogovinë. Nuk është Zhelinë. Nuk është Jegunovcë. Nuk është Bërvenicë.
Nëse kriteri ishte që në ceremoni të merrnin pjesë kryetarët e komunave që lidhen drejtpërdrejt me territorin dhe qytetarët që shërbehen nga Spitali Klinik i Tetovës, atëherë lista e komunave të Pollogut është shumë më e natyrshme se emri i kryetarit të Çairit.
Prandaj, shpjegimi “ishte aty si kryetar komune” nuk e mbyll pyetjen. Përkundrazi, e hap edhe më shumë.
Sepse në politikë nuk mjafton vetëm të thuash në çfarë cilësie ishte ftuar dikush. Duhet të shpjegosh edhe pse pikërisht ai ishte ftuar.
Dhe këtu problemi bëhet edhe më interesant: Izet Mexhiti nuk është vetëm kryetar i Çairit. Ai është edhe bashkëkryetar i VLEN-it.
Pra, qytetari ka të drejtë të pyesë:
A ishte aty kryetari i Çairit, apo bashkëkryetari i VLEN-it që duhej të dukej si kryetar komune?
Sepse kur në një ceremoni të punësimit në një spital publik shfaqen ministra, kryetarë komunash dhe figura të larta partiake, ndërsa para kamerave ndahen edhe vendime për punësim, kufiri mes institucionit dhe marketingut politik bëhet tepër i hollë.
Dhe pesë vendime për punësim të vendosura në duart e një politikani nuk janë thjesht një copë letër. Në një vend ku punësimi publik është temë jashtëzakonisht e ndjeshme, edhe simbolika ka peshë politike.
Nëse gjithçka ishte krejtësisht jopolitike, pyetja mbetet:
Pse duhej pikërisht bashkëkryetari i VLEN-it dhe kryetari i një komune jashtë Pollogut të merrte rolin ceremonial në Spitalin e Tetovës?
Sepse ndonjëherë marketingu politik nuk bëhet me flamuj partie dhe slogane.
Bëhet shumë më elegant:
me një ftesë institucionale, një podium, pesë vendime punësimi dhe kamera përballë.
Dhe pastaj na thuhet:
“Nuk kishte asgjë politike.”
Në rregull.
Atëherë le të shpjegohet publikisht dhe qartë: cili ishte kriteri për përzgjedhjen e kryetarëve që morën pjesë dhe pse kryetari i Çairit ishte më i përshtatshëm për të ndarë vendime punësimi në Tetovë sesa kryetarët e komunave që ndodhen pikërisht në rajonin e Pollogut?
Kjo është pyetja.
Dhe deri sa të marrë një përgjigje bindëse, justifikimi se “ishte aty vetëm si kryetar komune” tingëllon më shumë si mbulim institucional i një pranie me potencial të qartë politik sesa si shpjegim i plotë…www.telegrami.mk
Mesut Shabani
