Një flotë e fshehtë spiunësh dhe avionësh luftarakë të NATO-s ndoqi presidentin ukrainas Volodymyr Zelensky teksa ai udhëtonte nga Kievi për në Uashington në Shtetet e Bashkuara, raporton “Daily Mail”.
Një Boeing C-40A e marinës amerikane transportoi Zelensky përtej Oqeanit Atlantik dhe një avion luftarak e shoqëroi atë në atë pjesë të udhëtimit.
Vizita e presidentit ukrainas në SHBA u përmend për herë të parë kur kryetarja e Dhomës së Përfaqësuesve të SHBA-së, Nancy Pelosi, mori pjesë në Samitin e Parë Parlamentar të Platformës Ndërkombëtare të Krimesë në Zagreb në fund të tetorit. Presidenti i SHBA Joe Biden dhe Zelensky diskutuan një takim në Uashington më 11 dhjetor dhe Shtëpia e Bardhë ftoi zyrtarisht liderin ukrainas më 14 dhjetor.
Zelensky i tha Bidenit dhe Shtëpisë së Bardhë se donte që udhëtimi i tij i parë jashtë vendit që nga fillimi i luftës në Ukrainë të ishte në Shtetet e Bashkuara. Presidenti ukrainas e pranoi ftesën më 16 dhjetor dhe dy ditë më vonë u konfirmua se ai do të vinte vërtet në Uashington. Më pas për gjithçka është vënë në dijeni zyra e kryetares së Dhomës së Përfaqësuesve, Nancy Pelosi.
Udhëtimi dhjetë orësh i Zelensky, i cili përfshinte një takim me Biden në Zyrën Ovale, konferencën e tyre të përbashkët për shtyp në Shtëpinë e Bardhë dhe një fjalim në Kongresin e SHBA, u organizua relativisht shpejt.
Zelensky mbërriti nga Ukraina herët të mërkurën në një stacion treni në qytetin polak Przemyśl, një qytet jo shumë larg kufirit ukrainas-polak, ku mbërrijnë fillimisht shumë nga ata që ikin nga lufta në Ukrainë. Presidenti ukrainas u transferua më pas në aeroportin Rzeszow së bashku me ambasadoren e SHBA në Ukrainë Bridget Brink në automjetin e ambasadës amerikane. Zelensky hipi në aeroplan në orën 8:15 të mëngjesit, i cili më pas e transferoi atë në bazën e Forcave Ajrore Andrews në shtetin amerikan të Maryland, jo shumë larg Uashingtonit, ku ai u ul pak pas orës 12:00. Shtëpia e Bardhë mund të arrihet me makinë nga Baza e Forcave Ajrore Andrews në 30 minuta.
Zelensky po fluturonte me një avion të Forcave Ajrore të SHBA-së që zakonisht përdoret nga zyrtarë që renditen pak më poshtë se presidenti dhe nënpresidenti i SHBA-së për nga rëndësia.
Shtëpia e Bardhë e dërgoi konfirmimin për mbërritjen e Zelenskit vetëm në orën 01:00 të së mërkurës, pasi donte të sigurohej që ai ishte larguar nga Ukraina pa probleme.
Një aeroplan spiun Boeing E-3 Sentry, i njohur gjithashtu si AVAX, është dërguar nga Gjermania për të fluturuar në mënyrë të sigurt mbi Detin e Veriut dhe nëndetëset ruse që patrullojnë atë.
Ndërsa fluturoi mbi Britani, ai u pasua nga një avion luftarak i Forcave Ajrore të SHBA McDonnell Douglas F-15 Eagle, i cili zakonisht është i bazuar në bazën në Mildenhall, Konteja Suffolk. Sapo Zelensky u largua nga hapësira ajrore skoceze, F-15 u kthye në bazë.
Fluturimin me të cilin Zelensky mbërriti nga Evropa në Shtetet e Bashkuara, kureshtarët mund ta ndiqnin në internet në pjesën e fundit të udhëtimit, teksa udhëtoi përtej Atlantikut. Ai gjithashtu u shfaq shkurtimisht në shërbimet e gjurmimit të fluturimeve në internet ndërsa kalonte përmes Gjermanisë.
