Në lidhje me ngjarjet e festimit të 28 Nëntorit, ditës së flamurit shqiptar, është zbardhur rasti në drejtim të kapjes së autorëve konkretë që kanë shkelur rendin dhe qetësinë publike dhe përdhosën simbolet shtetërore. Mirëpo, nëse në prapavijë kemi ndonjë grup të organizuar që i ka nxitur drejtpërdrejt këto veprime, rasti ende nuk është zbardhur, deklaroi për Sitel, ministri i Punëve të Brendshme, Pançe Toshkovski.
Ai zbuloi se shërbimet e sigurisë kishin informacione operative se pas ngjarjeve në Shkup në ditën e festimit dhe në Kumanovë kur u dogjën veturat dhe një fotokopje, kishte struktura të larta të BDI-së.
“Nuk do të doja të publikoja tani informacione për opinionin, por fakti është se ka informacione të caktuara operative se një ish-kryetar komune i BDI-së është përfshirë drejtpërdrejt së bashku me një grup tjetër në pjesën e organizimit të këtyre ngjarjeve, por ndryshe nga më parë kur kishim persekutime politike një ton, tani MPB po vepron sipas drejtimit të PP me fakte dhe prova, nuk po shkojmë qorrazi si dikur. Kështu do të jetë edhe në këtë rast. Nëse sigurojmë prova, do të veprojmë”, tha Toshkovski.
Ai beson se MPB-ja ka vepruar në mënyrë profesionale dhe të duhur gjatë festimit të flamurit shqiptar në Shkup dhe se sipas vlerësimeve ka pasur prezencë adekuate të policisë.
Ndryshe, Prokuroria Themelore Publike Shkup ka përfunduar procedurën dhe ka dorëzuar aktakuzë në gjykatën kompetente kundër gjithsej katër personave të cilët në ngjarje të ndryshme në ditët e kaluara kanë kryer veprime që përmbajnë elemente të veprës penale – Shkaktim i urrejtjes, përçarjes ose mostolerancës mbi baza nacionale, racore, fetare dhe të tjera diskriminuese nga neni 319 paragrafi 1 i Kodit Penal. Për të katërit, të cilëve u ishte caktuar masa e paraburgimit në procedurën paraprake, prokurorët publik kërkuan nga Gjykata Themelore Penale Shkup që t’ua vazhdohet paraburgimi.
