Anëtarët e Komisionit Shtetëror Zgjedhor kanë takuar sot anëtarët e komisionit për sëmundje infektive, prej të cilëve kanë kërkuar më shumë detaje për protokollet për zbatimin e masave mbrojtëse dhe dhënien e materialeve mbrojtëse të nevojshme për zgjedhjet. Komisioni për sëmundje infektive pritet që periudhën në vazhdim të përgatit një raport për të gjitha kërkesat dhe t’ia dorëzojë KSHZ-së.
Ndërkohë, kryeministri Oliver Spasovski, përmes faqes së tij në Fejsbuk ka njoftuar se kanë arritur përgjigjet prej tre institucioneve, komisionit të sëmundjeve infektive, Komisionit Shtetëror Zgjedhor dhe misioni vëzhgues të OSBE-ODIHR, prej ku informojnë se presin datë për zgjedhje dhe në bazë të saj do të fillojnë përgaditjet për zgjedhje.
Oliver Spasovski
“Komisioni për sëmundje infektive ka dhënë raport, mendim profesional, protokoll për atë se si dhe në çfarë mënyre mund të mbahen zgjedhjet, si do të ishin tendencat lidhur me zhvillimin e sëmundjes. Komisioni Shtetëror Zgjedhor informoi për afatet të cilat janë të nevojshme për realizimin e aktiviteteve zgjedhore. Në letrën e OSBE-ODIHR na informojnë se presin datë për zgjedhje dhe në bazë të datës ti fillojnë të gjithë përgatitjet për dërgimin e misionit vëzhgues”
Mediat maqedonase kanë publikuar pjesë nga raporti që komisioni për sëmundje infektive i ka dërguar Qeverisë e ku konstatohet se pandemia është në fazë të qetësimit, ndërsa përgjigja përmban disa pika, gjendjen epidemiologjike, parashikime për periudhën në vijim, fushatën parazgjedhore dhe ditën e votimit.
Raporti i Komisionit për sëmundje infektive
“Numri i të sëmurëve të rinj nga KOVID19 në vendin tonë ka rënë dukshëm dhe për dhjetë herë ka rënë incidence prej para një muaji. Kjo është falë masave të Komisioni për sëmundje infektive e të cilat ministri i shëndetësisë ia ka përcjellur Qeverisë”
Në raport potencohet se “nuk priten befasi të mëdha dhe rritje të menjëhershme të numrit të rasteve të reja”. Por, njëkohësisht paralajmërohet se gjendja me Kovid19 do të zgjasë për një periudhë më të gjatë, më saktë deri në gjetjen e vaksinës dhe aplikimit të saj mes popullsisë në drejtim të krijimit të imunitetit kolektiv.
Si faktorë që do të mund të ndikonin negativisht në gjendjen momentale janë theksuar katër, hapja e kufijve vendor, pushimet verore jashtë vendit, fillimi i vitit shkollor dhe fillimi i sezonit të gripit. Këto janë pritet kur sipas komisionit, ashtu siç kalon koha, gjithnjë e më shumë do të rritet edhe rreziku nga vala e dytë e pandemisë.
Dokumenti i komisionit për sëmundje infektive ka dhënë protokole edhe për fushatën parazgjedhore, ku thuhet të mos organizohen tubime të mëdha dhe sipas mundësisë të sigurohet zërim, të mbahet distance fizike prej 1.5-2 metër, në fushatën derë më derë, detyrimisht të mbahen maska mbrojtëse, të ruhet distance me bashkëbiseduesit dhe të mos hyhet nëpër shtëpi. Aktivitetet partiake të zhvillohen në ambiente të hapura, por nëse nuk ka kushte atëherë në ambient të mnyllur më së shumti mund të zgjasin dy ore dhe pas përfundimit të ajroset dhe dizenfektohet hapsira. Protokoli i fushatës parasheh që pikat mobile për promovim të programeve partiake të mos shndërohen në qendra grumbullimi të qytetarëce, ndërsa transporti i organizuar partiak të realizohet me mjete të transportit publik dhe me kapacitet të mbushur më së shumti 50%.
Ditën e votimit të gjithë anëtarët e këshillave zgjedhor dhe vëzhguesit obligohen të mbajnë maska dhe në çdo vendvotim të ketë pajisje për dezinfektim dhe kosh për hedhje të mbeturinave. Votuesit, do të duhet të mbajnë distancë prej 1.5 deri më 2 metër, gjatë hyrjes në objektin e votimit të dizenfektohen, ndërsa gjatë dhënies së letërnjoftimit shkurtimisht të heqin maskën sa për identifikim.
Arben Zeqiri /SHENJA/
