Pas vendosjes së sanksioneve ndërkombëtare ndaj Rusisë për pushtimin e saj në Ukrainë, eksportuesi rus i energjisë elektrike InterRAO të dielën humbi mundësinë për të shitur energji elektrike në shtetet baltike.
“Ky është një hap i rëndësishëm në rrugën tonë drejt pavarësisë energjetike,” i tha AFP ministri lituanez i Energjisë Dainius Krevis.
Bursa e energjisë Nord Pool i dërgoi një njoftim InterRAO të premten, sipas të cilit tregtia në vendet baltike është e ndaluar pas vendosjes së sanksioneve ndërkombëtare.
Për vite të tëra, Letonia, Lituania dhe Estonia janë përpjekur për pavarësi energjetike nga Moska duke rritur prodhimin vendas të energjisë elektrike dhe duke ndërtuar ndërlidhje të rrjetit me Skandinavinë dhe vendet e tjera përreth.
Si rezultat, importet e energjisë elektrike nga Rusia në Letoni dhe Lituani, të cilat më parë ishin 1,300 megavat në vit, ranë në 300 megavat vitin e kaluar dhe tani janë ndalur plotësisht.
Letonia importoi për herë të fundit energji elektrike ruse në fillim të majit, ndërsa Lituania dhe Estonia ndaluan blerjen e saj të dielën.
“Duke refuzuar importimin e energjisë ruse, ne po refuzojmë të financojmë agresorin”, tha ministri lituanez.
Vitin e kaluar, energjia elektrike ruse përbënte 17% të importeve të energjisë elektrike të Lituanisë.
