Sipas Bankës Botërore, rindërtimi i të gjitha ndërtesave dhe infrastrukturës së dëmtuar në Ukrainë gjatë pushtimit rus, do të kushtojë afërsisht 60 miliardë dollarë.
Presidenti David Malpass tha në një konferencë të Bankës Botërore se vlerësimi i hershëm i kostove “të ngushta” të dëmit nuk përfshin kostot ekonomike në rritje të luftës ndaj Ukrainës, shkruan sky, transmeton portal arbresh.info
Shkalla e dëmit mbetet e paqartë në disa zona, si Mariupoli i bombarduar rëndë, megjithëse është sugjeruar se 90% e infrastrukturës së qytetit është shkatërruar.
“Sigurisht me luftën në vazhdim edhe kostot do të rriten”, tha ai.
Presidenti i Ukrainës, Volodymyr Zelensky, ka deklaruar se Ukrainës do t’i duheshin 7 miliardë dollarë në muaj për të kompensuar humbjet ekonomike të shkaktuara nga lufta.
Ai u kërkoi fuqive globale që të prishin menjëherë marrëdhëniet me Moskën, pavarësisht sanksioneve të rënda të vendosura nga Perëndimi./arbresh.info/
