Sektori i Krimit Kibernetik i Ministrisë së Brendshme, duke vepruar mbi informacionin e marrë fillimisht nga FBI-ja, kreu një hetim të përbashkët të koordinuar në lidhje me një treg të paligjshëm online të njohur si “OLVX”.
Ministria e Brendshme informon se sipas informacionit të dhënë, tregu online ishte aktiv që nga korriku i vitit 2023 dhe operonte përmes domeneve të shumta të internetit dhe përmbante një bazë të dhënash të detajuar të të dhënave personale të kompromentuara për regjistrimin e llogarive të klientëve dhe shitësve, me mbi 2,600 llogari përdoruesish dhe mbi 1,500 llogari shitësish të regjistruara.
Vlera totale e shitjes së artikujve tejkalon 500,000 dollarë amerikanë.
Si pjesë e procedurës, dhe bazuar në një urdhër gjykate të lëshuar nga Gjykata Themelore e Tetovës, u krye një kontroll në territorin e Komunës së Tetovës, në fshatin Reçicë e Madhe, në lokalet e të dyshuarve A.E. (20) dhe A.I. (23), shtetas maqedonas, për të cilët ka dyshime të arsyeshme se janë administratorë të tregut online të lartpërmendur.Gjatë kontrollit, ata u gjetën në vendngjarje duke kryer një krim për të cilin dyshohen, dhe u sekuestruan kompjuterë desktop, laptopë dhe telefona, të cilët do t’i nënshtrohen analizave të mëtejshme mjeko-ligjore dhe do të shërbejnë si prova në procedurën penale, ndërsa personat u privuan nga liria.
“Sektori i Krimit Kibernetik vazhdon të ndërmarrë masa dhe aktivitete për sqarimin e plotë të rastit, me qëllim identifikimin e të gjithë personave të përfshirë dhe sigurimin e provave përkatëse, në përputhje me rregulloret ligjore në fuqi”, deklaroi Ministria e Brendshme.
