Protestues të zemëruar në Indonezi kanë bastisur shtëpitë e disa politikanëve, duke marrë me vete sende luksoze, përfshirë makina Tesla dhe një statujë të madhe të Iron Man, pas deklaratave të papërshtatshme të politikanit Ahmad Sahroni që ndezën protesta kombëtare. Si pasojë, pesë ligjvënës u suspenduan.
Kaos i vërtetë shpërtheu pasi parlamenti miratoi një shtesë prej 3,000 dollarësh në muaj për strehimin e ligjvënësve, ndërkohë që punonjësit me pagë minimale përfitojnë vetëm rreth 200 dollarë në muaj. Kur kritikët kërkuan shpërbërjen e parlamentit, Sahroni i quajti ata “njerëzit më të marrë në botë”, duke shkaktuar zemërim masiv.
Pamjet e publikuara tregojnë protestues duke brohoritur “Duit rakyat!” (“Kjo është para e popullit!”) teksa bastisnin rezidencën e Sahronit dhe merrnin statujën e Iron Man, e cila vlen më shumë se sa shumica e indonezianëve mund të fitojnë për vite të tëra.
Ngjarja kulmoi kur një dërgues 21-vjeçar, Affan Kurniawan, u shtyp nga një automjet blinduar i policisë gjatë protestave, duke shkaktuar reagime të fuqishme në rrjetet sociale. Adresat e politikanëve u shpërndanë online dhe zemërimi i grumbulluar u shndërrua në veprime të koordinuara kundër tyre.
Presidenti Prabowo u detyrua të anuloj udhëtimin e tij në Kinë, ndërkohë që pesë persona humbën jetën gjatë trazirave. Parlamenti revokoi shtesat e miratuara për vetë ligjvënësit, ndërsa pesë ligjvënës u pezulluan për sjellje të pahijshme gjatë seancave, duke kërcyer dhe argëtuar veten ndërkohë që qytetarët luftonin për bukën e gojës.
Statuja e Iron Man u bë simbol i situatës: politikanët duke luajtur superhero me paratë e publikut, ndërkohë që qytetarët vuajnë pasojat ekonomike. Ngjarjet treguan qartë se kur politikanët tallin vështirësitë ekonomike të qytetarëve dhe shfaqin pasuri të tepruar, nuk duhet të habiten kur njerëzit shkojnë t’ua rikthejnë atë.
