Temperaturat deri në 20 gradë Celsius mbi normalen e sezonit, do të shënohen deri në mbrëmjen e sotme në Turqi, sipas Shërbimit Kombëtar Meteorologjik (MGN).
Meteorologët parashikojnë që sot, të dielën, temperatura në Stamboll do të arrijë 28°C, duke thyer një rekord shekullor, i cili është regjistruar në vitin 1911, me 27.7°C.
Temperaturat e tilla të larta zakonisht regjistrohen në korrik dhe gusht.Në muajin mars, temperatura mesatare në Stamboll varion nga 5 deri në 12 gradë.
Në bregdetin e Detit të Zi termometrat do të tregojnë 28-31 gradë, në vend të 2-12°C të zakonshme për këtë sezon.
Shërbimi meteorologjik parashikon gjithashtu se në Ankara temperatura do të arrijë në 28 gradë, në Izmir 27-30 dhe në Gaziantep dhe Sanliurfa të paktën 28 gradë.
Pas “valës së të nxehtit” të papritur të marsit, rikthimi në normalitet do të jetë i menjëhershëm, pasi të martën mbrëma merkuri do të bjerë në 2 gradë në Stamboll dhe 0 në Ankara, ku priten edhe reshje bore.
