Zëdhënësi i Departamentit amerikan të Shtetit, Matthew Miller tha se qeveria amerikane pajtohet me Bashkimin Evropian, lidhur me pretendimin e Serbisë për juridiksion në Kosovë.
“Ne pajtohemi me BE-në që projektligji i Serbisë që pretendon juridiksion ligjor në Kosovë shkel detyrimet e Dialogut”, ka shkruar në plaformën “X”, Miller.
Ai tutje ka theksuar se Prishtina dhe Beogradi duhet të zbatojnë marrëveshjet e arritura, përfshirë edhe atë për Asociacionin e komunave me shumicë serbe.
“Kosova dhe Serbia secila duhet të zbatojnë marrëveshjen e vitit 2023 duke përfshirë Asociacionin dhe zgjidhjet e dialogut për të gjithë qytetarët, përfshirë serbët në Kosovë”, shkruan tutje zëdhënësi i Departamentit amerikan të Shtetit.
Një ditë më parë, Bashkimi Evropian ka deklaruar se Serbia ka bërë shkelje të qartë të obligimeve nga dialogu, me projektligjin e propozuar të qeverisë për shpalljen e Kosovës zonë të mbrojtjes së veçantë dhe për organizimin dhe juridiksionin e autoriteteve gjyqësore në ndjekjen e veprave penale në Kosovë.
Zëdhënësja e BE-së, Nabila Massrali i ka bërë thirrje autoriteteve të Beogradit që të rishqyrtojë projektligjin, konform obligimeve që i ka ky shtet në proceset e integrimeve evropiane.
Ligji që Qeveria e Serbisë ia propozoi Kuvendit serb për miratim më 28 tetor, parasheh gjykime për të gjitha krimet e parapara me Kodin Penal të këtij vendi, të cilat janë kryer pas shpalljes së pavarësisë së Kosovës, në shkurt të vitit 2008.
Ky ligj u tha se do të zbatohet edhe për procedurat penale të nisura para miratimit të tij.
We agree with the EU that Serbia’s draft legislation claiming legal jurisdiction in Kosovo violates Dialogue obligations. Kosovo and Serbia each should implement the 2023 agreement including ASM, and the Dialogue’s solutions for all citizens, including Serbs in Kosovo.
— Matthew Miller (@StateDeptSpox) October 31, 2024
