Kryeministri Edi Rama ndodhet në Berlin ku po zhvillon një vizitë zyrtare. Ai është takuar me kancelarin Olaf Scholz me të cilin ka pasur një konferencë për shtyp. Aty, Rama i është përgjigjur pyetjeve të gazetarëve gjermanë. Një prej tyre kishte të bënte me iniciativën “17+1” me Kinën. Rama u shpreh se Shqipëria nuk ka ndërmend të largohet nga ky format edhe pse theksoi se Shqipëria është vendi nga të gjitha vendet e tjera të përfshira që nuk ka marrë asnjë investim. Prandaj, kreu i qeverisë u shpreh se bashkëpunimi është normal me Kinën.
Pyetje: Shqipëria vazhdon të jetë pjesë e iniciativës 17+1 me Kinën. Ka vende që janë larguar dhe prandaj të di a do të jeni aktivë në këtë iniciativë dhe pse ngulni këmbë në një bashkëpunim kaq të ngushtë me Kinën.
Edi Rama: Shqipëria ka mbajtur një qëndrim të qartë publik madje duke bërë edhe thirrje për të gjitha vendet e rajonit për të zgjedhur një alternativë për 5G dhe faktikisht e kemi bërë këtë shumë kohë më parë. Kështu që në këtë aspekt nuk kemi asnjë problem. Nga ana tjetër është e vërtetë. Ne jemi pjesë e formatit “17+1” dhe nuk kemi ndërmend të largohemi edhe pse për hir të së vërtetë Shqipëria është vendi nga të gjitha vendet e tjera të këtij formati që nuk ka përfituar asnjë investim. Nuk e di ku e bazoni këtë bashkëpunim të ngushtë me Kinën, pasi për arsye historike dhe psikologjike, bashkëpunimi ynë është fare-fare normal, dhe krahasuar me vendet e tjera është jorrelevant. Ideja që të largohemi nga forumi për të mbajtur qëndrim për çdo arsye më duket ide e gabuar. Mendoj se në botën ku jemi komunikimi, me të gjithë pa përjashtim, pavarësisht qëndrimeve, është A-ja. Besoj që vendet demokratike, vendet që besojnë tek vlerat e dialogut, janë ato që duhet të japin shembullin. Mendoj që komunikimi duhet të jetë gjithmonë dhe me këdo.
Iniciativa “17+1” është bashkëpunimi zyrtar midis Kinës dhe vendeve të Evropës Qendrore e Lindore ku promovohen marrëdhëniet e biznesit dhe investimeve. Pjesë e kësaj iniciative janë Shqipëria, Bosnja, Bullgaria, Kroacia, Çekia, Estonia, Greqia, Hungaria, Lituania, Letonia, Maqedonia e Veriut, Mali i Zi, Polonia, Rumania, Serbia, Sllovakia dhe Sllovenia./tvklan.al
