Familjarë, anëtarë të partisë, shokë, kunetër… Janë vetëm disa nga personat të cilët i ka punësuar në funksione shtetërore ministri për Vetëqeverisje Lokale, Goran Milevski brenda mandatit të tij trevjeçar. Të dhënat i publikoi A1on nga hulumtimi që bëri.
“Bëhet fjalë për persona që edhe pse punojnë në institucione lokale dhe shtetërore, në mënyrë paralele janë edhe anëtarë të Bordit Drejtues të një institucioni tjetër. Por, ka edhe të tillë që kanë arritur të marrin angazhime të paguara mirë në Ministrinë për projekte të cilat realizohen përmes Agjencisë zvicerane”, thuhet në hulumtimin e A1ON.
“Deri më tani kam dëgjuar për punësime partiake dhe nepotizëm, por nuk kam dëgjuar për kategori – miq. Kur angazhojmë njerëz po udhëhiqemi nga cilësia dhe profesionalizmi i personave të angazhuar, e jo në bazë të përkatësisë së tyre partiake”, theksoi Goran Milevski, ministër për vetëqeverisje lokale.Me këtë nuk pajtohet nënkryetarja e PLD-së, Monika Zajkova. Ajo në deklaratë për TV21 thotë “partia PLD deri më tani nuk ka pasur afera dhe skandale, çdo herë vendimet i sjell në bazë të transparencës dhe ndershmërisë”.
Monika Zajkova, nënkryetare e PLD-së:
-Në suazë të partisë, ne asnjëherë nuk kemi diskutuar për personat e angazhuar dhe shpresoj se kjo çështje do ta diskutojmë së pari brenda partisë për të parë çfarë dhe si është bërë dhe pastaj do të dalim me deklarata konkrete.
TV21: Atë desha t’Ju pyes. Kur mund të pritet që të shqyrtohet kjo në nivel të partisë dhe nëse tashmë keni kërkuar një gjë të tillë?
-Unë personalisht nuk kam kërkuar, partia ka kuadro cilësore dhe kompetente dhe duhet të bisedohet. Unë shpresoj se sa më shpejtë që është e mundur do të thirret seancë e bordit ekzekutiv ose qendror të partisë dhe se kjo çështje do të shqyrtohet me qëllim që të shihet se si do të zhvillohen punët më tutje.
Përndryshe, disa media publikuan se deputetët e PLD-së kërkojnë të zëvendësohet kryetari i partisë, Milevski, pasi i njëjti u shpreh kundër pranimit të propozimit francez.
