Gjermania njoftoi të martën se ka reduktuar kufizimet e udhëtimit me Britaninë dhe katër vende të tjera si rezultat i përhapjes së variantit Delta të koronavirusit.
Instituti i shëndetit publik në Gjermani tha se i ka kategorizuar Britaninë, Portugalinë, Rusinë, Indinë dhe Nepalin një shkallë më poshtë në renditjen e rrezikut: nga “zona me variant shqetësues” në “zona me përhapje të madhe”.
Kjo nënkupton se udhëtarët nga këto vende nuk kanë nevojë të rrinë në karantinë nëse mund të vërtetojnë se kanë bërë vaksinën kundër COVID-it. Ata që nuk janë vaksinuar duhet të respektojnë një periudhë 10-ditore karantine. Periudha mund të reduktohet në pesë ditë nëse personi rezulton negativ në analizat për COVID.
Të hënën Kryeministri britanik Boris Johnson njoftoi se qeveria ka si synim të heqë më 19 korrik masat izoluese, të vedosura pas shfaqjes së variantit Delta që është shumë më ngjitës.
Zoti Johnson tha se maskat dhe distancimi fizik në mjedise të brendshme nuk do të jenë më të detyrueshme, por shtoi se bizneset në mënyrë individuale mund të vendosin t’i kërkojnë këto protokolle mbrojtëse.
Ai tha se vendimi përfundimtar për rihapjen do të merret javën e ardhshme.
Ndërkaq, Pallati Mbretëror i Britanisë njoftoi të hënën se Dukesha Kate është në vetë-karantinë pasi kishte qenë në kontakt me një person që më pas rezultoi pozitiv për koronavirus.
Në zhvillimet e fundit në frontin e vaksinave, Japonia njoftoi se do të dhurojë këtë javë 1.1 milionë doza të tjera të vaksinës AstraZeneca për Tajvanin. Kjo dërgesë pason një sasi prej 1.24 milionë dozash që Japonia i dhuroi Tajvanit një muaj më parë.
Ky vend-ishull ka qenë një ndër historitë e pakta të suksesit në rrjedhën e pandemisë, pasi arriti ta vërë nën kontroll shumë shpejt infeksionin duke rezultuar në ritme shumë të ulëta në përhapje dhe viktima. Por papritur e gjen veten përballë një vale infeksionesh për të cilat ka fajësuar ekuipazhet e avionëve të kompanisë shtetërore kineze China Airlines si dhe një vatër me të identifikuar në një hotel në Aeroportin Ndërkombëtar Taoyuan.
Vende të tjera, në përpjekje për të shtuar numrin e të vaksinuarve po hyjnë në marrëveshje duke krijuar aleanca praktike.
Izraeli dhe Koreja e Jugut kanë njoftuar shkëmbimin e një sasie të barabartë vaksinash. Në bazë të marrëveshjes, Izraeli do t’i dërgojë Koresë së Jugut në fund të muajit 700,000 doza të vaksinës Pfizer, ndërsa Koreja e Jugut do t’i dërgojë Izraelit një sasi të njëjtë vaksinash Pfizer në shtator.
Përhapja e variantit Delta, të identifikuar për herë të parë në Indi ka çuar në shtim të ritmeve të infeksioneve në mbarë botën. Indonezia tha të hënën se po kërkon furnizime me oksigjen pasi ka pasur rritje të shtrimeve në spital si rezultat i variantit Delta.
Në Luksenburg, zyrtarët thanë të hënën se kryeministri 48-vjeçar Xavier Bettel është në gjendje të rëndë, por të stabilizuar, pasi u sëmur me COVID-19. Ai rezultoi pozitiv pas një takimi dy ditësh me udhëheqës të BE-së në Bruksel.
Nga pandemia e koronavirusit janë konfirmuar mbi 185.1 milionë infeksione në shkallë globale, ndër to 3.9 milionë me pasoja fatale, sipas Universitetit Johns Hopkins. Deri tani janë bërë 3.2 miliardë doza vaksine në mbarë botën.VOA
