Filipçe publikon një skandal të ri: Dokumentet zbulojnë për ujë të ndotur me baktere koliforme në Spitalin e Leshokut
Kryetari i LSDM-së, dr. Venko Filipçe, në konferencën e sotme për media publikoi një skandal të ri, gjithashtu të lidhur me cilësinë e ujit të pijshëm, këtë herë për një mostër të marrë në Spitalin për Sëmundje të Mushkërive në Leshok. Sipas Filipçes, dokumentet zyrtare të siguruara nga sinjalizues (whistleblowers) tregojnë se në këtë spital është konstatuar ujë i pijshëm i pasigurt për shëndetin, ndërsa institucionet kompetente nuk kanë ndërmarrë asnjë veprim.
Filipçe theksoi se raporti i Qendrës për Shëndet Publik, i hartuar pas analizës së mostrës së ujit të marrë në spital, evidenton devijime serioze nga parametrat e lejuar.
Raporti për analizën e sigurisë së ujit është për një mostër të marrë në Spitalin për Sëmundje të Mushkërive në Leshok. Data e përfundimit të analizës është 13 maji. Numri i përgjithshëm i baktereve koliforme në 100 mililitra ujë është 51. Mostra është marrë nga një çezmë brenda spitalit ku trajtohen pacientë. 51 baktere koliforme në 100 mililitra ujë. Në raport thuhet qartë se uji nuk i plotëson standardet e cilësisë së kërkuara për konsum. Bëhet fjalë për spitalin në Leshok, në fund të muajit maj, ndërsa askush nuk ka reaguar. A e dinë këta njerëz çfarë po bëjnë? Çfarë lloj menaxhimi i një institucioni është ky?”, deklaroi Filipçe.
Në konferencën për media, Filipçe vlerësoi se një papërgjegjshmëri e tillë nga autoritetet përbën rrezik të drejtpërdrejtë për shëndetin e qytetarëve dhe kërkoi reagim të menjëhershëm nga institucionet përgjegjëse.
Cili është qëllimi? Të rrezikohet shëndeti i të gjithë qytetarëve në vend. Kërkojmë mbikëqyrje të jashtëzakonshme dhe analiza të menjëhershme të të gjitha sistemeve të furnizimit me ujë në shtet. Rezultatet e analizave fizike – turbullira, aroma dhe parametrat e tjerë, analizat kimike – nitratet, nitritet dhe amoniaku, si dhe analizat mikrobiologjike dhe të dhënat mbi klorimin e ujit, të publikohen në mënyrë transparente”, deklaroi kryetari i LSDM-së, Venko Filipçe
.
