Statusi i neutralitetit të Zvicrës mund të vihet në testin më të madh në dekada. Ministria e Mbrojtjes e Zvicrës po afrohet me fuqitë perëndimore në përgjigje të pushtimit rus të Ukrainës.
Ministria zvicerane e Mbrojtjes është duke përpiluar një raport mbi opsionet e sigurisë që përfshijnë stërvitje të përbashkëta ushtarake me anëtarët e NATO-s dhe dërgimin e municioneve, tha për Reuters Paelvi Pully, kreu i politikës së sigurisë në Ministrinë e Mbrojtjes së Zvicrës.
Detajet e diskutuara në qeverinë zvicerane nuk janë bërë publike. “Mund të ketë ndryshime në mënyrën se si interpretohet neutraliteti,” tha Pully në një intervistë javën e kaluar.
Ministrja e Mbrojtjes Viola Amherd, e cila është rrugës për në Uashington, tha se Zvicra duhet të punojë më ngushtë me aleancën ushtarake të udhëhequr nga SHBA, por jo të bashkohet me të, raportojnë mediat zvicerane.
Ideja e anëtarësimit të plotë në NATO është diskutuar, por ndërsa Suedia dhe Finlanda, vende që kanë gjithashtu një histori neutraliteti, janë në prag të anëtarësimit, Pula tha se raporti nuk ka gjasa të rekomandojë marrjen e këtij hapi. Raporti do të përfundojë deri në fund të shtatorit, kur do të shqyrtohet nga qeveria zvicerane.
Ministria e Mbrojtjes do të kontribuojë gjithashtu në një studim më të gjerë të përgatitur nga Ministria e Punëve të Jashtme. Projekti do të shikojë miratimin e sanksioneve, eksportet e armëve, municionet dhe marrëdhëniet me NATO-n nga një perspektivë neutrale, tha ministria e jashtme.
Zvicra tashmë ka disa lidhje me NATO-n, vitin e kaluar vendosi të blejë aeroplanët luftarakë më modernë amerikanë me shumë role të gjeneratës së pestë Lockheed Martin F-35A, të cilët janë blerë ose përdorur tashmë nga disa anëtarë të NATO-s. “Zvicra nuk mund të anëtarësohet në asnjë aleancë për shkak të neutralitetit. “Por ne mund të punojmë së bashku dhe sistemet që blejmë janë një bazë e mirë për këtë,” i tha ministri Amherd transmetuesit publik zviceran.FOTO: EPA / LAURENT GILLIERON
