Lëvizja Besa i bën thirrje aktivistëve të saj të mbështesin kandidatët e Aleancës për Shqiptarët në raundin e dytë zgjedhor. Një mbështetje reciproke partia e Bilall Kasamit e kërkon edhe për kandidatët e saj në Tetovë dhe Zhelinë.
Në raundin e dytë të zgjedhjeve lokale të gjithë votuesit e Besës të mbështesin kandidatët e ASH-së duke ndihmuar kështu në mposhtjen politike të BDI-së dhe PDSH-së. Gjithashtu kërkojmë nga ASH-ja që në formë reciproke t’i bëj thirrje votuesve të mbështesin kandidatët e Lëvizjes Besa në Tetovë dhe Zhelinë -deklaroi Arjanit Hoxha, Sekretar i përgjithshëm i Lëvizjes Besa.
Edhe pse nga Lëvizja Besa thonë se thirrja dhe mbështetja në parim i adresohet koalicionit Aleanca për Shqiptarët- Alternativa, nga partia e Afrim Gashit thonë se me Lëvizjen Besa nuk kanë një marrëveshje bashkëpunimi.
Mund të ju flas për Alternativën. Në këtë rast neve nuk kemi asnjë marrëveshje me atë parti -tha Zeqirja Ibrahimi, Alternativa.
Thirrje për mbështetje paraprakisht kishte adresuar edhe Aleanca për Shqiptarët duke kërkuar mbështetjen në Gostivar, Strugë, Dibër, Çair dhe komunat e tjera në këmbim të mbështetjes në Tetovë dhe Zhelinë. Nga ky subjekt thonë se thirrja i referohet qëndrimit partiak dhe jo marrëveshjes dy paleshe. Veprimi i Lëvizjes Besa erdhi një ditë pas marrëveshjes së arritur mes Ali Ahmetit dhe Menduh Thaçit për mbështetjen e kandidatëve të BDI-së në komunat ku garojnë.
