Prokuroria Themelore Publike në Shkup ka iniciuar procedurë kundër një shtetasi amerikan 42-vjeçar, i cili pas ndalimit në stacion policor ka sulmuar me kuti tre policë.
Ngjarja ka ndodhur mëngjesin e sotëm kur shtetasi i huaj është ndaluar në Komisariatin e Policisë Kisella Vodë për kundërvajtje të mëparshme kundër rendit dhe qetësisë publike. Teksa ka hyrë në korridorin e stacionit ka nisur të godasë inventarin dhe kur njëri nga policët e ka paralajmëruar të ndalojë, ai është kthyer dhe e ka goditur me grusht në fytyrë.
E njëjta gjë ka ndodhur edhe me dy policët e tjerë që tentuan ta mposhtin. Pas disa kohësh, zyrtarët policorë kanë arritur ta mposhtin të dyshuarin.
Ndaj tij do të ngrihet kallëzim për veprën penale – Sulm ndaj personit zyrtar gjatë kryerjes së detyrave të sigurisë nga neni 383 paragrafi 2 lidhur me paragrafin 1 të Kodit Penal, njoftuan nga Prokuroria Publike Shkup.
Pasi që në rastin konkret nuk ka mundësi tjetër për sigurimin e prezencës së të dyshuarit gjatë procedurës, prokurori publik i ka dorëzuar gjyqtarit të procedurës paraprake propozim për caktimin e masës së paraburgimit.
