“Përmbushni marrëveshjen” – ky është mesazhi që Antonio Costa solli në Shkup. “Asnjë aventurë pa garanci” – kundërpërgjigjet qeveria maqedonase. Ndërsa Brukseli këmbëngul në zbatimin e angazhimeve të ndërmarra, Shkupi kërkon siguri se procesi do të ketë një fund…Qeveria mbetet e përkushtuar fuqimisht në rrugën evropiane, tha kryeministri Hristijan Mickoski, duke shtuar se ai dhe Presidenti i Këshillit Evropian Antonio Costa diskutuan “një çështje shumë më të thellë – nëse ideja evropiane vazhdon të jetë një ide që frymëzon, bashkon dhe krijon besim”.
Ne nuk kërkojmë privilegje, por respekt për parimet evropiane, vlerësim të procesit të reformave. Identiteti nuk duhet të jetë pengesë për perspektivën evropiane – Mickoski është decid
“Ne nuk kërkojmë privilegje, nuk kërkojmë rregulla të zbutura. Ne kërkojmë parime, ne kërkojmë një proces në të cilin reformat, puna dhe detyrimet e përmbushura do të vlerësohen vërtet. Qeveria do të vazhdojë të zbatojë axhendën e reformave, të forcojë institucionet, të stabilizojë ekonominë, të tërheqë investime dhe të përmirësojë shërbimet publike. Pas viteve të pritjes, kompromiseve dhe kërkesave të përmbushura, është e natyrshme që qytetarët të ndiejnë pasiguri. Nevojitet lidership, qartësi dhe besim. Evropa ishte më e forta kur tregoi vizion, guxim politik dhe qëndrueshmëri ndaj vlerave të veta. Unë gjithashtu besoj se dinjiteti, identiteti dhe parimi nuk duhet të jenë pengesë për perspektivën evropiane”, deklaroi kryeministri Mickoski.
Presidenti i Këshillit Evropian Antonio Costa me një mesazh – të zbatohet ajo që u ra dakord në vitin 2022. Ndryshimet kushtetuese janë thelbësore për fillimin formal të negociatave të pranimit. Ai theksoi se nuk ka vend për marrëveshje të reja ose rinegocim të kornizës negociuese të miratuar tashmë.
“Bashkimi Evropian u ka siguruar paqe dhe stabilitet të qëndrueshëm shteteve të tij anëtare përmes institucioneve demokratike elastike dhe lidhjeve të forta ekonomike. Zgjerimi si i tillë u ofron të njëjtat mundësi fqinjëve tanë evropianë, siç është Maqedonia e Veriut. Megjithatë, miratimi i ndryshimeve kushtetuese të dakorduara mbetet e vetmja mënyrë për të nisur zyrtarisht negociatat e pranimit. Ajo që është rënë dakord në vitin 2022 duhet të zbatohet dhe asgjë më shumë. Kjo është e vetmja mënyrë për të zhbllokuar përfitimet e plota të anëtarësimit në Bashkimin Evropian për qytetarët e Maqedonisë së Veriut”, tha Presidenti i Këshillit Evropian Antonio Costa.
Costa vlerësoi progresin e qeverisë në zbatimin e axhendës së reformave drejt miratimit të udhërrëfyesve për sundimin e ligjit dhe reformën e administratës publike, e cila është e rëndësishme për rrugën e pranimit të Maqedonisë.
