Zëvendëskryeministri dhe kryetari i Kuvendit të ASH-së, Arben Fetai përmes një postimi ka drejtuar kritika ndaj kreut të BDI-së, Ali Ahmeti dhe ish-kryeministrit teknik Talat Xhaferi,duke theksuar se po mashtrojnë opinionin lidhur me vendimin e Gjykatës Kushtetuese për anulimin e vendimit të Qeverisë për dhënien e pëlqimit për themelimin e Shkollës së Mesme Private “Medreseja Isa Beu” në Kondovë të Shkupit.
Fetai lidhur me këtë ka publikuar edhe një dokument. Reagimi i tij më poshtë:
Partia, liderit të së cilës i janë përzier kombi dhe feja, po kundërshton vendimin e Gjykatës Kushtetuese – gjyqtarët e së cilës i ka zgjedhur vetë kjo parti – për anulimin e vendimit të Qeverisë për dhënien e pëlqimit për themelimin e Shkollës së Mesme Private “Medreseja Isa Beu” në Kondovë.
Për të sqaruar opinionin publik: vendimi i propozuar nga MASH ka hyrë në procedurë qeveritare në kohën e BDI-së, në fund të nëntorit 2023. Në fillim të dhjetorit të po atij viti, Qeveria, nën udhëheqjen e Dimitar Kovaçevskit, e ka hequr këtë pikë nga rendi i ditës, bazuar në raportin e Komisionit për Resurse Njerëzore dhe Zhvillim të Qëndrueshëm dhe në mendimin e Sekretariatit për Legjislacion të Qeverisë, i cili thotë se: “nuk janë përcaktuar mundësi ligjore që BFI në RMV të themelojë shkollë të mesme private në të cilën do të organizohet dhe realizohet mësim për arsimin e mesëm të gjimnazit.”
Më 26 mars 2024, kur kryeministër teknik ishte Talat Xhaferi, propozim vendimi i MASH u rikthye si pikë shtesë në mbledhjen e Qeverisë dhe u miratua, krahas mendimit negativ të Sekretariatit për Legjislacion. Pra, kjo përbën një tjetër mashtrim të BDI-së ndaj popullit dhe besimtarëve myslimanë, me qëllimin e vetëm: përfitimin elektoral.
