Kryeministri i Republikës së Kosovës, Albin Kurti tha sot në një intervistë për AFP se dinari serb nuk është zyrtarisht i “ndaluar” në Kosovë, por ai theksoi se vetëm euro është mjet ligjor për transaksionet tregtare.
“Ne nuk po i ndalojmë dinarët serb, njerëzit mund të kenë dinarë serb, por mjeti i vetëm i pagesës është euro”, tha Kurti, duke këmbëngulur se serbët e Kosovës nuk do të ndëshkohen për mbajtjen e valutës.
Kurti theksoi se ishte vendosur një periudhë kalimtare njëmujore për të lehtësuar rregulloren e re, e cila do të lejonte komunikim të mëtejshëm dhe kohë për të zgjidhur këto çështje.
“Nuk është qëllimi ynë as të ndëshkojmë dikë dhe as të befasojmë qytetarët”, tha Kurti.
Deklaratat e tij erdhën pasi Serbia akuzoi Qeverinë e Kosovës për bllokimin fizik të një dërgese dinarësh në kufi të mërkurën.
