U refuzua kërkesa e punësimit për 72 punonjës të rinj në Spitalin e Kumanovës duke përfshirë infermierë, mjekë dhe të tjerë. Ministria e Financave u arsyetua se përgjigja u bazua në Ligjin për Buxhetet, por nuk dhanë asnjë shpjegim konkret, shkruan Portalb.mk.
Si pasojë e mungesës së personelit dhe infermierëve, Spitali i Përgjithshëm i Kumanovës përballet me vonesa në shërbime, mbingarkesë të stafit dhe vështirësi në ofrimin e kujdesit ndaj qytetarëve.
Ndonëse Spitali i Përgjithshëm Kumanovë ka kërkuar punësime të reja, kërkesa u refuzua nga Ministria e Financave.
“Kërkesa për punësime të reja është refuzuar nga Ministria e Financave, dhe për arsyet, përgjigjen kërkojeni në Ministrinë e Financave”, thanë nga Spitali i Kumanovës.
Ministria e Financave nuk tregon se pse konkretisht e kanë refuzuar kërkesën për punësime në këtë sipital.
“Ministria e Financave ka dërguar përgjigje për kërkesën e paraqitur nga përdoruesi buxhetor, në pajtim me Ligjin për Buxhetet”, thanë nga Ministria e Financave.
Kujtojmë se më 13 korrik nga Spitali i Përgjithshëm i Kumanovës për Portalb.mk patën theksuar se kanë paraqitur kërkesë për miratimin e 72 punësimeve të reja për personelin e nevojshëm. Megjithatë kjo procedurë ka ngecur.
Ndryshe, në vitin 2024, sistemi i kujdesit shëndetësor primar në Maqedoninë e Veriut shënoi ulje të ndjeshme si në numrin e kontratave të lidhura ashtu edhe në numrin e mjekëve të përgjithshëm. Sipas të dhënave të publikuara në Fondit për Sigurim Shëndetësor, numri i përgjithshëm i kontratave të lidhura në kujdesin shëndetësor primar ishte 2.077, që përfaqëson një ulje prej 55 kontratash krahasuar me vitin 2023. Gjithashtu, numri total i mjekëve në këtë sektor në vitin 2024 ishte 2.796, që është 45 më pak se një vit më parë. Vetëm në kategorinë e mjekëve të përgjithshëm, këtë vit janë regjistruar 1.499 mjekë aktivë, 8 më pak se në vitin 2023.
