Tri komuna nga juglindja do të prodhojnë vetë energji elektrike. Radovishi, Konçe dhe Vasilevë kanë filluar të ndërtojnë një sistem të termocentraleve fotovoltaike me kapacitet të përgjithshëm 430 kilovat dhe një sistem softuer digjital që do të mundësojë një pasqyrë të drejtpërdrejtë në kohë të situatës aktuale. Tabelat do të vendosen në çatitë e sallës së sportit 25 maj dhe shkollës fillore Krste Petkov Misirkov në Radovish. Investimi i përgjithshëm kap vlerën rreth 23 milionë denarë, pjesa më e madhe e të cilave është siguruar nga Ministria e Vetëqeverisjes Lokale dhe Agjencia Zvicerane për Zhvillim, ndërsa të tria komunat kanë edhe pjesën e tyre.
Energjia elektrike e prodhuar do të ndahet në tri pjesë, prej të cilave 50% është për Radovishin, ndërsa Konçe dhe Vasilevë do të marrin nga 25%. Për kryetarët e komunave realizimi i këtij projekti është shumë domethënës sepse në këtë mënyrë i bashkohen trendit botëror të komunave të pavarura nga energjia.
Instalimi i impianteve fotovoltaike duhet të përfundojë brenda gjashtë muajsh. Projekti zbatohet nga Qendra për Zhvillimin e Rajonit Planor Juglindor si pjesë e skemës së granteve të projektit “Zhvillimi i balancuar rajonal i qëndrueshëm dhe gjithëpërfshirës”, – faza e 2-të.
