www.telegrami.mk

Satirë politike 5 minuta para 12, i`u kujtua Mickoskit se bashkëjetesa sjell fitoren…malsorët kur nuk besojnë…thonë kapërceva lumin….

Mickoskit po i digjet bishti, ndaj bërtet: “U dogj fshati!”

Tri vjet në pushtet, e tani në Bërvenicë i kujtohet bashkëjetesa! Kur fillojnë të shtohen telashet politike, papritur kryeministri bëhet predikues i harmonisë shqiptaro-maqedonase. Po Pollogu, zoti Mickoski, ku mbeti?

Mickoski ka telashe të heshtura për opinion me të paknaqurit brenda VMRO-DPMNE …humbja do i hajë kokën politike brenda kampusit maqedonas…

Shkruan: Mesut Shabani | Telegrami.mk

Kur dhelprës i digjet bishti, bërtet: “U dogj fshati!” Një shprehje e vjetër popullore, por që nganjëherë duket sikur është shkruar enkas për disa politikanë të kohës sonë.

Kryeministri Hristijan Mickoski, gjatë fushatës në Bërvenicë, paska zbuluar një të vërtetë të madhe: shqiptarët dhe maqedonasit do të vazhdojnë të jetojnë bashkë edhe pas zgjedhjeve. Çfarë zbulimi! Sikur qytetarët të kishin nevojë për lejen e tij për të vazhduar jetën e përbashkët edhe pas 2 nëntorit!

Shqiptarët dhe maqedonasit kanë jetuar krah për krah shumë kohë përpara se Mickoski të bëhej kryeministër. Do të vazhdojnë të jetojnë bashkë edhe pasi politikanët e sotëm të jenë larguar nga skena politike. Qytetarët ndërtojnë jetën, krijojnë familje, punojnë e bashkëjetojnë; politikanët ndërrojnë pozitat, koalicionet dhe, kur afrohen zgjedhjet, edhe fjalorin.

Por pyetja që lind është: pse Mickoskit iu kujtua kaq fort bashkëjetesa pikërisht tani, në mes të fushatës në Bërvenicë?

Mos vallë fushata kërkon më shumë se premtime? Mos vallë qytetarët kanë filluar të kërkojnë llogari edhe brenda kampit politik që deri dje u kërkonte besim?

Nuk kemi nevojë të hamendësojmë se çfarë po ndodh brenda VMRO-DPMNE-së. Mjafton të shohim një fakt politik: kur kryeministri u drejtohet qytetarëve me kaq këmbëngulje për të mos u ndarë, është e drejtë që ata ta pyesin edhe për rezultatet konkrete të qeverisjes.

Tri vjet pushtet: tani premtohen rrugë, shkolla e kopshte!

Mickoski premtoi në Bërvenicë se qeveria do ta ndërtojë rrugën nga Stençe në Gurgurnicë, kopshtin në Çellopek, shkollën në Sedllarcë dhe stadiumin në Radiovc.KORRIDORI 8 …telashe me ndërkomkbëtarët

Shumë mirë! Qytetarët nuk kanë asgjë kundër rrugëve, shkollave, kopshteve dhe stadiumeve. Përkundrazi, i meritojnë. Por, zoti kryeministër, a mund të dimë edhe kur do të realizohen këto projekte, me çfarë buxheti dhe në çfarë afati?

Sepse premtimi nuk është investim, njësoj siç fotografia pranë një projekti nuk është inaugurim.

Për tri vjet në pushtetin qendror, qeveria duhet të japë llogari për investimet kapitale në Pollog. Në vend të deklaratave të përgjithshme, qytetarët meritojnë një bilanc të qartë: çfarë është financuar, çfarë është realizuar dhe çfarë ka mbetur në letër.

Nëse projektet janë detyrë e qeverisë, pse duhet të tingëllojnë si dhuratë elektorale?

Rruga nuk është pronë e Mickoskit. Shkolla nuk është pronë e VMRO-DPMNE-së. Kopshti nuk është shpërblim për votuesit. Janë investime publike që financohen për qytetarët dhe që duhet të realizohen sipas nevojave të tyre.

Dhe Pollogu nuk përfundon në Bërvenicë. Edhe shqetësimet për mungesën e investimeve në shkollat shqipe, përfshirë ato në Krushevë, kërkojnë përgjigje institucionale dhe verifikim konkret të gjendjes në terren.

Fëmijët nuk mund të presin deri në fushatën e ardhshme që pushteti të kujtohet për shkollat e tyre.

Bashkëjetesa në fjalë, të drejtat në pritje?

Kryeministri thotë se qytetarët duhet të votojnë me arsye e me zemër, jo sipas përkatësisë etnike. Kjo është një thirrje që duhet të vlejë për të gjithë, edhe për vetë qeverinë.

Por atëherë, zoti Mickoski, le të flasim edhe për zbatimin e të drejtave gjuhësore, përfshirë çështjen e provimit të jurisprudencës në gjuhën shqipe.

Kjo çështje kërkon sqarim të qartë për gjendjen ligjore, pengesat institucionale dhe hapat e ndërmarrë. Nëse qytetarët kërkojnë zbatimin e të drejtave që u takojnë, nuk mjafton t’u thuhet se duhet të jetojnë në harmoni. Duhet t’u jepet edhe përgjigje konkrete për kërkesat e tyre.

Bashkëjetesa nuk matet vetëm me atë se sa qetë kalon një fushatë zgjedhore. Ajo matet edhe me mënyrën se si institucionet i trajtojnë qytetarët kur kamerat fiken dhe politikanët largohen nga tribunat.

Nuk mund t’u kërkosh shqiptarëve të mos mendojnë për përkatësinë etnike kur votojnë, e pastaj të mos pranosh që ata të kërkojnë llogari për barazinë, gjuhën, shkollat dhe investimet.

Mickoski, mos na e shit bashkëjetesën si projekt të ri!

Në Bërvenicë, kryeministri paralajmëroi se politikanët do të largohen, ndërsa shqiptarët dhe maqedonasit do të vazhdojnë të jetojnë së bashku.

Sigurisht! Por qytetarët duan të dinë edhe çfarë do të mbetet pas largimit të politikanëve: rrugë të ndërtuara apo vetëm premtime, shkolla të përmirësuara apo vetëm fotografi, të drejta të zbatuara apo vetëm fjalime?

Mickoski ka të drejtë t’u kërkojë qytetarëve të gjykojnë projektet. Por e njëjta e drejtë u takon qytetarëve për ta gjykuar qeverinë sipas punës së bërë gjatë mandatit.

Dhe këtu qëndron ironia: kur kërkohet vota, të gjithë bëhen miq të qytetarëve; kur kërkohet llogaria, fillojnë ligjëratat për durimin, bashkëjetesën dhe rrezikun e përçarjes.

Bashkëjetesa nuk është pronë e asnjë partie. As shqiptare, as maqedonase, as e Mickoskit. Ajo është vlerë e qytetarëve dhe përgjegjësi e institucioneve.

Prandaj, zoti kryeministër, mos u shqetësoni aq shumë se si do të jetojnë shqiptarët e maqedonasit pas 2 nëntorit. Ata do të vazhdojnë të jetojnë bashkë. Shqetësohuni më shumë se si do të jetojnë: me çfarë shkollash, me çfarë investimesh, me çfarë të drejtash dhe me çfarë perspektive.

Sepse qytetarët nuk kanë nevojë për një kryeministër që u kujton para zgjedhjeve se duhet të bashkëjetojnë. Kanë nevojë për një qeveri që ua dëshmon çdo ditë se shteti u përket të gjithëve.

Dhe, në fund, po kthehemi te dhelpra e urtësisë popullore.

Kur dhelprës i digjet bishti, bërtet se u dogj fshati. Kur politikës i vjen koha për të dhënë llogari, papritur i kujtohet bashkëjetesa.

Por, zoti Mickoski, qytetarët nuk kërkojnë që ju t’ua shpëtoni bashkëjetesën. Kërkojnë që t’ua përmirësoni jetën. Bishtin politik mbajeni vetë nën kontroll!…www.telegrami.mk

================================================

P.S.Bilall Kasami i dërgoi sinjale votuesve se i trembet BDI kinse po e shet lojën,që nënkupton është me heshtje me VMRO,pra ndërmjet rreshtave u tha besatarëve të flaktë mos dilni të votoni …Por Mickoski dhe Nikoloski e dijnë çka i pret….Kasami dhe VMRO a tash e gjetën të lajmërojnë se do të takohen pas zgjedhjeve për poste që i bie era …

eh autobusat…BDI vërtetë është për ti mos besuar …sinjale për Vmro

Mesut Shabani