Xhamia e Plumbit, një ndër objektet më të rralla të trashëgimisë osmane në Ballkan është restauruar plotësisht. Ky objekt kulti është inauguruar këtë të enjte me prezencën e personaliteteve vendore dhe Ambasadorit Turk në Tiranë.
Për kryetarin e Bashkisë, Benet Beci, ky moment është më shumë se një investim në trashëgimi kulturore, është një ndjesi krenarie për të gjithë qytetin.
Ambasadori i Turqisë në Shqipëri theksoi rëndësinë e bashkëpunimit mes dy qeverive për të ruajtur thesaret historike.E ndodhur pranë hyrjes së Kalasë së Rozafës, në një pikë të veçantë ku përplasen historia dhe natyra, kjo xhami është simbol i identitetit kulturor të Shkodrës.
E ndërtuar në vitin 1773 dhe e njohur për mbulesën e saj unike me plumb, Xhamia ka sfiduar kohën, përmbytjet dhe harresën. Pas dëmeve të përsëritura nga përmbytjet dhe koha, ajo u restaurua falë bashkëpunimit të Qeverisë Turke dhe Qeverisë Shqiptare.
/abcnews.al/
