Zgjedhja e gjykatësve kushtetues dhe ambasadorëve si dhe ndryshimet në ligjin për mësimdhënësit janë vetëm disa nga proceset e ngecura në procedurat parlamentare, ndërkohë që pushteti dhe opozita e bartin fajin për këtë, shkruan Alsat.
Pikërisht dialogu politik në Kuvend është kritikuar në Raportin e fundit të Komisionit Evropian për vendin.
Kryetari i Institutit për Demokraci Societas Civilis, Marko Troshanovski, në kuadër të përpjekjeve për tejkalimin e kësaj situate vlerëson se duhet të minimizohet përdorimi i flamurit evropian, por edhe bllokimi i zgjidhjeve ligjore përmes amendamenteve të panumërta.
“Mund të shohim një pjesë të madhe në të kaluarën, pothuajse gjithmonë amendamentet nga opozita refuzohen, edhe pse shumë prej tyre kanë kuptim, disa janë sigurisht populiste dhe kanë synim politik të përditshëm. Megjithatë, respektimi i kapacitetit dhe synimeve të tjetrit për të kontribuar në cilësinë e një ligji çon në situatë të tillë të hapjes së llogoreve”, tha Marko Troshanovski – Kryetar i Institutit për Demokraci Societas Civilis.
Raporti i fundit evropian gjithashtu thekson se nga gjithsej 159 ligje të reja, 79 janë miratuar me procedurë të shkurtuar dhe 67 në mënyrë të rregullt. Sipas Troshanovskit, Sekretari i Përgjithshëm i Kuvendit ose ndonjë shërbim ekspertësh duhet të punojë në depolitizimin e vendimit se cili ligj mund të konsiderohet me flamur evropian. Në ndërkohë, ai nuk pret debat serioz konstruktiv në Kuvend derisa të plotësohen dy kushte.
“Ndryshimi demokratik i vetë partive, demokratizimi i statuteve të tyre që të mos ketë liderë të përjetshëm që askush nuk mund t’i problematizojë. Krijon bazë politike shumë më të orientuar në mënyrë demokratike për të kandiduar më tej në zgjedhje dhe, së dyti, ndryshimi në modelin zgjedhor që tani krijon deputetë besnikë, të cilët udhëhiqen pa kushte në daljet e tyre nga interesat e partisë së tyre”, u shpreh Marko Troshanovski – Kryetar i Institutit për Demokraci Societas Civilis.
Në raport thuhet gjithashtu se është bërë pak progres në zbatimin e zotimeve për miratimin e amendamenteve tashmë të dakorduara të Rregullores, të cilat deputetët i harmonizuan në kuadër të dialogut “Zhan Mone”. Por Troshanovski vlerëson se votimi për ndryshimet është peng i politikës./ Alsat.mk
