Gjatë ditë së djeshme qytetarët e Gostivarit mbajtën marsh protestues kundër vendimit të KRRE-së për shtrenjtimin e rrymës elektrike për 7.4%, ndërsa marshin e udhëhoqi tifo-grupi “Kastriotët Gostivar”.
Marshi i gostivarasve filloi nga Pallati i Kulturës u ndal para ndërtesës së ELEM-it, kaloi nëpër sheshin e Gostivarit dhe përfundoi para objektit të EVN-së.
Organizatorët e protestës para EVN-së i shpalosën kërkesat e tyre edhe atë: të hiqet vendimit i rritjes së çmimit të energjisë elektrike dhe të ulet çmimi për 20%, të hiqet monopoli i shërbimeve të EVN-së, të shpërbëhet KRRE-ja dhe të krijohet trup i pavarur që do të kontrollojë cilësinë e shërbimeve në fushën e energjetikës.
Protesta zgjati pak më shumë se një orë dhe kaloi pa incidente nën vëzhgimin e policisë. Në fund të objektit të EVN-së u hodhën vezë dhe letra banjoje.
Protestën e mbështetën artistë dhe sportistë nga Gostivari, figura publike fetare e politike ndërsa protesta e djeshme është protesta e katërt e tifo-grupit “Kastriotët Gostivar” kundër shtrenjtimit të rrymës elektrike.
Protesta e ngjashme kishte në Tetovë dhe qytete tjera në Maqedoninë e Veriut./Telegrafi/
