Policia e Tetovës i ka demantuar shkrimet në disa mediume, se do të ketë kontrolle nëpër shtëpi të qytetarëve nga ana e policisë.
Nga Sektori për Punë të Brendshme në Tetovë thonë se kontrollet për mbrojtje nga coronavirusi, janë në pajtim me vendimet e Qeverisë, përcjell Telegrafi Maqedoni.
“SPB Tetovë i hedh poshtë si të pavërteta informacionet të publikuara në disa mediume, se do të kryhen kontrolle në shtëpi, të cilat i konsiderojmë si spekulime dhe informacione të rrejshme, të cilat kanë ndikim negativ në situatën në të cilën ndodhemi”.
“Policia kryen aktivitete vetëm për zbatim të dekreteve qeveritare, qëllimi i të cilave është të parandalohet Covid-19. Në këto aktivitete, do të kontrollohet përdorimi i pasjisjeve mbrojtëse nga ana e qytetarëve. Gjithashtu do të kontrollohet respektimi i protokolleve në objektet hotelerike, si dhe objekte tjera publike”, thonë nga SPB Tetovë.
Ata sërish apelojnë tek qytetarët që t’u përmbahen masave për parandalimin e coronavirusit.
