Satirë politike të ndodhive politike lidhur me Shkollën e Policisë sot deklaratë nga Ministri i MPB -së Toshkoski 24.09. 2026
Në Maqedoninë e Veriut duket se edhe hyrja në shkollën e policisë ka filluar të funksionojë sipas një rregulli të ri: kandidati aplikon, pushteti numëron, opozita kundërshton, ndërsa “kushtet” vendosin kush hyn e kush pret.
Ministri i Punëve të Brendshme, Pançe Toshkovski, doli me shifrën e tij: nga 520 kandidatët për Shkollën e Mesme të Policisë, vetëm 31 kanë qenë shqiptarë dhe vetëm 11 janë pranuar.
Pastaj erdhi deklarata që e bën historinë edhe më interesante:
“Duhet të punojmë më shumë për t’i motivuar të gjitha etnitë.”
Pra, sipas këtij versioni, problemi qenka motivimi.
Por opozita shqiptare solli një tjetër version. Deputetja Rina Ajdari pretendoi se mbi 100 shqiptarë i kanë plotësuar kushtet për pranim.
Dhe këtu fillon pjesa më interesante e këtij seriali institucional:
31 apo mbi 100?
Një numër del nga ministria, një tjetër nga opozita. Ndërsa qytetari shqiptar mbetet në mes, duke pyetur veten nëse po aplikon për shkollën e policisë apo për një provim në matematikën politike.
==================================================================
DHE PASTAJ SHFAQET FJALA MAGJIKE e Mickoskit-kryeministër : “KUSHTET”
Më 04 .09. 2026 , kryeministri Hristijan Mickoski u pyet për mundësinë që në Shkollën e Mesme të Policisë “7 Maji” mësimi të zhvillohet edhe në gjuhën shqipe.
Përgjigjja ishte pothuajse poetike:
“Ne si Qeveri e kemi dhënë përgjigjen tonë. Për më tej, duhet pyetur MPB-ja.”
Kaq.
Qeveria e ka dhënë përgjigjen, por përgjigjja duket se nuk e ka marrë ende rrugën deri te zbatimi.
Dhe kjo të kujton një formulë tashmë të njohur:
Po, mundet.
Por vetëm nëse plotësohen kushtet.
Cilat kushte?
Kushtet janë gjithmonë aty. Janë si një derë pa çelës: të gjithë e shohin, por askush nuk e hap.
Kur bëhet fjalë për shqiptarët, gjithmonë ka një “nëse”.
Nëse plotësohen kushtet.
Nëse ka interes.
Nëse ka kandidatë.
Nëse ka ligj.
Nëse ka marrëveshje.
Nëse ka bashkëpunim.
Dhe në fund, kur të gjitha “nëse”-të bashkohen, mbetet vetëm një pyetje:
Po kush duhet t’i krijojë kushtet?
Sepse nuk mund t’u thuash shqiptarëve: “Motivohuni dhe aplikoni”, ndërkohë që kur ata aplikojnë, fillon një tjetër kapitull me shifra, kuota, ligje, kushte dhe përgjegjësi të transferuara nga një institucion te tjetri.
Sot MPB-ja thotë një gjë.
Opozita shqiptare thotë tjetër.
Qeveria thotë: pyeteni MPB-në.
MPB-ja thotë: duhet të motivohen shqiptarët.
Ndërsa shqiptarët, me sa duket, duhet të jenë aq të motivuar sa të kalojnë edhe labirintin administrativ përpara se të arrijnë te dera e shkollës.
DHE KËTU ËSHTË THELBI
Nuk është problemi vetëm te numri 31, 11 apo 100.
Problemi është se kur përfaqësimi shqiptar në institucionet e sigurisë diskutohet, gjithmonë duket se përgjegjësia udhëton në një drejtim:
nga pushteti te kandidati.
Në vend që pyetja të jetë vetëm:
“Pse nuk aplikojnë më shumë shqiptarë?”
duhet të ketë edhe pyetje të tjera:
Sa aplikuan? Sa i plotësuan kushtet? Sa u eliminuan dhe për çfarë arsye? Si u zhvillua procesi i përzgjedhjes? Kush e kontrolloi? Dhe a ka transparencë të plotë për rezultatet?
Sepse në një shtet serioz, përfaqësimi nuk rregullohet me deklarata motivuese.
Dhe aq më pak me fjalën magjike:
“Kushtet”.
Kushtet duhet të jenë të njëjta për të gjithë, të matshme, transparente dhe të verifikueshme.
Përndryshe, rrezikojmë të kemi një sistem ku dera zyrtarisht është e hapur, por në praktikë gjithmonë gjendet dikush që thotë:
“Po, por…”
Dhe ky “por” politik tashmë po bëhet më i gjatë se vetë ligji.
Nga provimi i jurisprudencës te shkolla e policisë, formula duket e njëjtë:
“Po, në parim.”
Pastaj vjen pjesa tjetër:
“Nëse plotësohen kushtet.”
Dhe kur qytetari pyet kush i përcakton kushtet, përgjigjja është e thjeshtë:
“Për këtë pyeteni dikë tjetër.”
Në ndërkohë, dera mbetet aty.
E hapur në deklarata.
E mbyllur në praktikë...ndërsa VLEN nuk hesht fët e fët do e nxjerë zëdhënësin që do të thotë nuk e kemi parë as dëgjuar deklaratën …ndërsa si zakonisht zv/ministri i MPB nga VLEN do hyjë nëpër programe televizive nga vetura zyrtare(asnjëherë para foltores së MPB -së …mbase nuk e kan lejuar të përgjigjet aq sa di) kuptohet do të arsyetojë Ministrin dhe Kryeministrin …
www.telegrami.mk
===========================================================
Mesut Shabani
