www.telegrami.mk
Më 4 shtator 1992, shqiptarët kishin pesë ministra në qeverinë e parë politike të shtetit të pavarur. Sot, 34 vite më vonë, VMRO-DPMNE na shet “progresin”, ndërsa VLEN na kërkon të duartrokasim.
Çfarë ironie!
Në vitin 1992, shteti sapo kishte dalë nga Jugosllavia dhe ende po mësonte si funksionon një shtet i pavarur. Megjithatë, në qeverinë e Branko Crvenkovskit kishte pesë ministra shqiptarë, në resorë të rëndësishëm.
Sot, pas 34 vitesh, pas Marrëveshjes së Ohrit, pas ndryshimeve kushtetuese, pas gjithë atyre fjalimeve për “barazi”, “integrim” dhe “partneritet strategjik”, VMRO-DPMNE-ja na ofron një zbulim të madh historik:
Shqiptarët paskan ardhur shumë shpejt në qeveri.
Prandaj, sipas kësaj logjike të re politike, duhet të kthehemi pak prapa.
Jo shumë.
Vetëm 34 vite.
VMRO: “Përparim duke u kthyer prapa”
VMRO-DPMNE-ja ka shpikur një koncept të ri të progresit:
sa më shumë ecën koha, aq më shumë duhet të kthehemi në vitet ’90.
Në vitin 1992 shqiptarët ishin në qeveri.
Në vitin 2026 diskutojmë ende nëse shqiptarët duhet të përfaqësohen drejt.
Në vitin 1992 gjuha, përfaqësimi dhe pjesëmarrja politike ishin çështje të nxehta.
Në vitin 2026 prapë po diskutojmë të njëjtat gjëra.
Vetëm se tani kemi Facebook, TikTok, konferenca për media dhe ministra që na shpjegojnë se “gjithçka është në rregull”.
Po, gjithçka është në rregull.
Vetëm ora është prishur.
Dhe këtu hyn VLEN-i – heroi i madh i kthimit prapa
Por VMRO-ja nuk do të mund ta bënte këtë spektakël e vetme.
Për këtë kishte nevojë për një partner.
Dhe kush tjetër do ta luante më bukur rolin e partnerit shqiptar sesa VLEN-i?
VLEN hyri në qeveri me flamurin e ndryshimit.
Premtoi se do ta çonte zërin shqiptar më lart.
Premtoi se do të sillte barazi.
Premtoi se do të ishte gardiani i interesave shqiptare.
Dhe pastaj…
erdhi momenti i madh: u ul në karrige dhe harroi pse kishte ardhur.
Nga “do ta ndryshojmë sistemin” kaluam në:
“Mjafton që jemi brenda.”
Ky është suksesi i madh historik i VLEN-it:
nga luftëtarë për barazi – në dekor qeveritar.
VMRO e kthen orën 34 vite prapa, ndërsa VLEN qëndron pranë saj me buzëqeshje dhe i thotë:
“Mos u shqetëso, Hristijan, shqiptarët nuk do të ankohen shumë.”
Në vitin 1992 kishte pesë ministra. Në vitin 2026 kemi pesë arsyetime.
Dikur shqiptarët kërkonin poste.
Sot kërkojnë zbatimin e Kushtetutës.
Dikur kërkonin përfaqësim.
Sot duhet të dëshmojnë pse përfaqësimi duhet të jetë i drejtë.
Dikur kërkonin gjuhën.
Sot duhet të shpjegojnë pse gjuha e tyre nuk duhet të trajtohet si dekor festiv.
Dikur problemi ishte shteti.
Sot problemi është bërë shqiptari që kërkon nga shteti të sillet si shtet.
Çfarë progresi!
34 vite për të bërë një rreth të plotë
Më 4 shtator 1992 filloi qeveria e parë politike e shtetit të pavarur.
Sot, më 2026, pas 34 vitesh, duket sikur dikush ka shtypur butonin:
“RESTORE FACTORY SETTINGS – 1992.”
VMRO thotë: “Maqedonia është më e fortë.”
VLEN thotë: “Ne jemi pjesë e vendimmarrjes.”
Ndërsa qytetari shqiptar pyet:
“Mirë, po ku është ndryshimi?”
Dhe përgjigjja është fantastike:
Ndryshimi është se tani keni ministra që ju shpjegojnë pse nuk duhet të ankoheni.
Kjo është politika e re.
VMRO fiton pushtetin.
VLEN fiton karriget.
Dhe shqiptari fiton një tjetër leksion për durimin.
Nëse kjo quhet ndryshim, atëherë le të kthehemi edhe 10 vite të tjera prapa
Sepse në këtë ritëm, zgjedhjet e ardhshme mund të na premtojnë diçka edhe më madhështore:
rikthimin e vitit 1991.
E pse jo?
Në fund të fundit, nëse 34 vite demokraci nuk mjaftuan për ta bindur politikën maqedonase se shqiptarët janë pjesë e barabartë e këtij shteti, ndoshta na duhet edhe një referendum tjetër.
Ndërsa VLEN mund të dalë me sloganin:
“Na votoni – ta mbrojmë rikthimin në të kaluarën!”
VMRO e ka orën.
VLEN e ka baterinë.
Dhe shqiptarët po shikojnë akrepat duke u kthyer prapa.
34 vite më vonë, pyetja nuk është më se sa ka ndryshuar shteti.
Pyetja është:
Si arritëm të kemi më shumë vite shtet, por të njëjtën politikë?
Dhe mbi të gjitha:
A e solli VLEN-i ndryshimin në qeveri, apo vetëm e solli qeverinë te VLEN-i?…www.telegrami.mk
===================================================================
lajmet krahasuese
================================================================
Lexo MINISTRA
https://vlada.mk/mk-MK/vlada/sostav-na-vlada
www.telegrami.mk
