Prej rreth 20 mijë amvisërive në Tetovë që janë faturuar për mbeturinat, rreth 4 mijë janë dërguar në pagesë të detyrueshme, pohon Hans Roth drejtori i kompanisë “Saubermacher” që menaxhon me mbeturinat. Kjo sipas tij ka ndodhur për shkak se nuk kanë mundur t’i gjejnë adresat, ndonëse e pranon se nga muaji në muaj niveli i pagesave po rritet dhe ka arritur në 65%.
E pyetëm kryetarin e Tetovës Bilall Kasamin se si është e mundur që noteri të arrijë ta gjejë adresën e amvisërisë, por këtë s’mund ta bëjë postieri që dërgon faturat e mbeturinave.Kasami apelon qytetarët që të drejtohen deri tek Ndërmarrja komunale të rregullojnë çështjen e adresave pasi në Tetovë nuk do të ketë mundësi që të ofrohet shërbimi pa pagesë për mbeturinat. Kompania “Saubermacher” para një viti ka marrë tender për menaxhimin e mbeturinave në Tetovë, ndërsa javë në parë në TV21 u ankuan qytetarë duke treguar se janë dërguar në pagesë të detyrueshme, ndonëse paraprakisht nuk kishin marrë fatura. Kompania mohoi duke thënë se vërejtjet dhe faturat janë dërguar në kohë.
