Gjykata Themelore në Prilep vendosi një dënim me burg me kusht prej dy vitesh kundër një punonjësi të spitalit të Prilepit, i cili, midis gushtit 2024 dhe prillit 2025, përvetësoi në mënyrë të paligjshme 2.110.640 denarë (afër 35 mijë euro) të mbledhur nga pacientët.
Siç njoftoi Drejtoria e Policisë Financiare, zyrtari nga Spitali i Përgjithshëm i ISHP-së “Borka Taleski” – Prilep kreu veprën penale të përvetësimit në detyrë, në përputhje me nenin 354 paragrafi 2 në lidhje me paragrafin 1 dhe në lidhje me nenin 45 të Kodit Penal.
Edhe pse i akuzuarii i ktheu fondet, gjykata e shpalli fajtor dhe e dënoi me burgim me kusht prej dy vitesh, të cilin nuk do ta vuajë nëse nuk kryen një krim të ri në katër vitet e ardhshme.
“Ky rast është pjesë e një hetimi më të gjerë nga Drejtoria e Policisë Financiare, e cila ka analizuar operacionet financiare të spitalit të Prilepit për muaj të tërë dhe në të njëjtën kohë konfirmon angazhimin tonë për të luftuar korrupsionin dhe keqpërdorimin e fondeve publike. Kthimi i parave nuk e përjashton nga përgjegjësia, drejtësia duhet të jetë e barabartë për të gjithë.
Dëmtimi i buxhetit publik, veçanërisht në sektorin e shëndetësisë, është i papranueshëm dhe çdo përpjekje për të fshehur ose injoruar veprime të tilla përbën kërcënim për besimin e qytetarëve në institucione”, njoftojnë nga Drejtoria e Policisë Financiare.
