Kandidati për kryetar dege i BDI-së në Çair, Bekim Neziri, tha sonte në emisionin Click Plus në TV21 se është dashur të zgjedhë mes Ali Ahmetit dhe Izet Mexhitit. Ai tha se nuk e ka pasur të lehtë sepse me Izet Mexhitin njihen prej 25 vjetësh, mirëpo kur bëhet fjalë për kontributin e Ali Ahmetit, ai i jep të drejtë këtij të fundit. Neziri tha se i gjithë mospajtimi i “Grupit të zjarrit” ka lindur si mospajtim për punën e ekzekutivit, por pa dhënë emra konkret se për kë bëhet fjalë.
“Unë është dashur të zgjedh mes politikës së Ali Ahmetit dhe politikës së Izet Mexhitit. Nuk e kam pasur lehtë të dal kundër një shokut tim prej 25 vjetësh, mirëpo kur është në pyetje kontributi i Ali Ahmetit, jo vetëm në segmentin politik, por edhe rrethanat e tjera, kjo më jep të drejtë që mes Izet Mexhitit dhe Ali Ahmetit, të zgjedh Ali Ahmetin. Mosmarrëveshja me Izet Mexhitin ka lindur për punën e ekzekutivit ose mospajtimin për punën e ekzekutivit. Mirëpo, deri sa kritikat qëndrojnë brenda BDI-së është në rregull, por kur fillojnë të paraqitet një kërkesë që lanson aktivitete të ndryshme paralele, ajo është thyerje e statutit të BDI-së.”- tha Neziri.
