Sekretari i Përgjithshëm i NATO-s, Jens Stoltenberg është në kontakt të rregullt me presidentin serb, Aleksandar Vuçiq, tha shefi i Zyrës Ndërlidhëse të NATO-s në Beograd, Giampiero Romano, duke vlerësuar se “çdo gjë që bëjmë së bashku bazohet në kërkesat e Serbisë dhe përshtatet me nevojat e saj”. Korrespondenti i MPB-së nga Beogradi.
– Serbia zgjedh se në cilat fusha dëshiron të përparojë apo përmirësohet, ku NATO mund të japë vlerë të shtuar. Dinamika dhe shtrirja e mbështetjes sonë varet nga Serbia, tha gjenerali Romano.
Ai deklaroi se Beogradi është një partner i çmuar i aleancës dhe se në 16 vitet e fundit, NATO dhe Serbia kanë zhvilluar një partneritet reciprok të dobishëm, me respekt të plotë për neutralitetin ushtarak të Serbisë.
Duke thënë se aleanca trajnon ushtarët serbë për misionet paqeruajtëse, Romano shtoi se edukimi dhe trajnimi për oficerët dhe personelin është bërë i mundur në disa mënyra.
– Ne po ndihmojmë Serbinë që të modernizojë forcat dhe institucionet e saj të sigurisë. Ne kemi investuar miliona euro për të ndihmuar Serbinë të shkatërrojë qindra ton municione të vjetruara, tha Romano.
Ai deklaroi se shkencëtarët serbë po punojnë me kolegët e tyre të NATO-s në shumë zgjidhje që përmirësojnë jetën në fushat e energjisë, sigurisë mjedisore, kundër-terrorizmit, mbrojtjes kibernetike dhe mbrojtjes së mjedisit.
Romano tha se shqetësimet për ndikimin e Rusisë në Ballkanin Perëndimor janë rritur që kur Moska nisi pushtimin e saj në Ukrainë.
“Në muajt e fundit kemi parë sulme kibernetike, dezinformata, presion ekonomik dhe detyrim politik, tha Romano për portalin e internetit European Western Balkans.
Romano tha gjithashtu se NATO do të vazhdojë të ndihmojë partnerët të forcojnë sigurinë kibernetike dhe aftësinë për të luftuar dezinformimin.
Lidhur me qëndrimin e publikut në Serbi ndaj NATO-s, Romano tha:
– Nuk duhet të harrojmë kurrë të kaluarën, por mund të ecim përpara. Serbia dhe NATO po bëjnë pikërisht këtë, përmes një partneriteti afatgjatë – ata po shohin drejt një të ardhmeje më të mirë.
Romano ka thënë se KFOR-i është treguesi më i madh i përkushtimit shumëdekadash të Aleancës për siguri të përhershme në Kosovë dhe stabilitet në mbarë Ballkanin Perëndimor.
Sipas tij, NATO e mirëpret marrëveshjen për normalizimin e marrëdhënieve ndërmjet Kosovës dhe Serbisë me ndërmjetësimin e Bashkimit Evropian.
“Tani është thelbësore që të dyja palët të fillojnë të përmbushin plotësisht dhe sa më shpejt detyrimet e tyre”, tha Romano.
