Policia maqedonase po heton për ekzistencën e një punishteje për falsikimin e parave në rajonin e Tetovës. Brenda grupit hetimor bëjnë të ditur se paratë e kapura të falsikuara më 27 janar në një kazino të Kumanovës, krijojnë pista hetimi në rajonin e Tetovës ku dyshohet për një punishte, e cila jo pak bankënota i ka lëshuar për përdorim, njofton Alsat.
Para ka marr edhe një shtetas nga Kosova identiteti i të cilit akoma nuk është bërë i njohur për policinë.
E gjitha që i është thënë Policisë është fakti se paratë janë marrë nga një person me makinë të tipit Audi rreth orës 22:00 në afërsi të Tetovës.
Në treg janë lëshuar kryesisht bankënota 50 dhe 100 euro.
Të njëjtat janë përdorur në harxhimet e përditshme si: restorante, kafene, qendra tregtare dhe kazino.
Subjektet, të cilat kanë pranuar shumën e parave gjithashtu janë vendosur nën hetimin e policisë, ndërsa jozyrtarisht mësohet se disa kazino po hetohen për shkak të marrjes së parave të falsikuara dhe për më tepër valutave euro.
Më 27 janar në Kumanovë u arrestuan dy shtetas për lëshimin në qarkullim të parave të falsikuara.
Në makinën e një 43 vjeçari të arrestuar janë gjetur edhe 11 bankënota, ndërsa paraprakisht ishte konstatuar se i njëjti në shoqëri të një 32-vjeçari kanë lëshuar në përdorim një shumë të konsiderueshme të parave të rreme, vlerë e cila sipas Policisë arrin në 80 mijë denarë.
Sipas Kodit Penal, përpunimi, lëshimi dhe përdorimi i parave të falsikuara dënohet nga 1-10 vite burg, ndërsa në masë efektive përfshihet edhe personi fizik apo subjekti i cili i ka pranuar të njëjtat dhe nuk i ka denoncuar.
