Në Tiranë, pas lokaleve dhe bizneseve ka nisur të zbatohet urdhri për lavazhet dhe gomisteritë, të cilat ndodhen mes pallateve apo zonave të banuara dhe kanë zënë sipërfaqen publike.Një pjesë e madhe e tyre e kanë bërë vetë kanë çmontimin e strukturave, heqjen e tendave, karrigeve dhe tavolinave nga trotuaret, ndërsa për të tjerët që ende nuk kishin filluar me zbatimin e aksionit është dashur ndërhyrja e Inspektoratit Kombëtar të Mbrojtjes së Territorit.
Ndërsa kryeministri Edi Rama përmes një postimi në rrjetet sociale shkruan se jo vetëm ngrehinat e hekurit, po edhe platformat e turlillojshme nën to, do të zhbëhen hap pas hapi, përditë e me durim, derisa të vendoset kudo kufiri që garanton lirinë e hapësirës komunitare dhe përcakton deri ku mund të shtrihen tavolinat, karriget e çadrat e njësive tregtare.Ky reagim vjen dy ditë pasi kreu i qeverisë paralajmëroi se së shpejti do të konsultohet me komunitetet dhe sipërmarrësit e vegjël mbi një projekt të quajtur “Rregullorja Kombëtare e Hapësirës Publike”.
Në kryeqytet janë hequr barriera, tavolina të vendosura pa leje, kioska të paligjshme si dhe struktura që pengonin lëvizjen e lirë të qytetarëve, teksa u bëhet thirrje qytetarëve të raportojnë çdo rast abuziv.
Aksioni pritet të vijojë edhe gjatë gushtit, në të gjithë territorin e vendit, si pjesë e një strategjie më të gjerë për përmirësimin e hapësirave të përbashkëta dhe jetës urbane./vizionplus.tv
