Kryetari i Komunës së Tetovës, Bilall Kasami, sot në një konferencë për media ku promovoi përfundimin e asfaltimit të një rruge në lagjen Çarshia e Epërme në Tetovë, u ankua se si komunë opozitare vazhdimisht janë nën presion nga pushteti qendror, më shumë konkretisht nga Departamenti i Punëve të Brendshme, shërbime të caktuara inspektuese dhe nga Enti Shtetëror i Revizionit. Kasami u ankua se edhe për çështje të parëndësishme policia bën kontrolle pa asnjë urdhër të marrë.
– Ne jemi komunë opozitare, Departamenti për Krimin e Organizuar po na troket në derë aty ku nuk ka kompetenca. Aty mund të reagojnë vetëm nëse ka krim, por me urdhër të Prokurorisë Publike. Ata po trokasin në derë edhe për disa probleme punësimi në SHF Liria, ku ka bazë për të vepruar Inspektorati i Punës e jo policia, tha Kasami, përcjell PRESSonline.al
Lidhur me shkrimet e fundit në media të caktuara se tenderët e shpallur nga Komuna e Tetovës zakonisht i fiton një kompani, Kasami thotë se të gjitha këto janë akuza të pabaza sepse ai nuk vendos se kush do ta fitojë tenderin, por normat ligjore. Nëse dikush ka ndonjë dyshim, ne jemi të hapur për bashkëpunim, shtoi ai.
– Nuk jam unë ai që vendos se cila kompani do të marrë cilin tender. Ndoshta nuk më pëlqen një kompani, por nuk mund të vendos, ka ligje dhe procedura për këtë. Në pjesën e kompanive, një pjesë e kësaj rruge është realizuar nga një kompani për të cilën ka pasur dyshime të caktuara dhe pikërisht për këtë ka pasur dyshime se kjo pjesë e rrugës nuk do të realizohet. Angazhimi im do të jetë që të gjitha projektet të realizohen sipas standardeve dhe të kontrollohen të gjitha projektet, tha Kasami, përcjell PRESSonline.al
Pas ankesave për presione nga autoritetet qendrore, Kasami nuk pranoi të përgjigjet për disa çështje aktuale politike. Siç tregoi ai, ngjarja e sotme është për promovimin e projekteve të rëndësishme për qytetin.
