Izraeli është i gatshëm të eksportojë gaz në Evropë përmes Italisë.
Dëshirën e tij, kryeministri i Izraelit, Benjamin Netanyahu, ia bëri të qartë homologes italiane, Giorgia Meloni, të cilës i tregoi se ka hapësirë për bashkëpunim më të madh mes dy vendeve. Netanyahu i bëri këto komente në fillimin e vizitës së tij treditore në Romë.
Lideri izraelit nënvizoi se dëshiron të krijojë lidhje më të thella me Italinë në shumë fusha, përfshirë në sektorin e ujërave, atë kibernetik dhe në sektorin e energjisë.
“Italia ka thënë se dëshiron të bëhet qendër për furnizimin e Europës me energji. Ne kemi të njëjtin mendim, dhe nga ana tjetër kemi edhe mjaft rezerva gazi që tani po i eksportojmë. Do të donim të kishim më shumë eksporte të gazit në Evropë përmes Italisë.“- u shpreh Netanyahu.
Pavarësisht varësisë së saj të madhe nga gazi rus, Italia e ka treguar përkushtimin që të zëvendësojë importet e energjisë nga Moska pas pushtimit të Ukrainës. Por ajo duket kërkon edhe më shumë se kaq: Ambicia e Romës me gjasë, është të përfitojë nga kjo situatë dhe të bëhet një transportuese e madhe e gazit nga Afrika e Veriut dhe në Mesdhe.
Izraeli ka nënshkruar një marrëveshje nëntorin e kaluar me kompanitë Eni dhe TotalEnergies, që mundëson që kompanitë e energjisë të nisin eksplorimin për gaz natyror brenda kornizës së marrëveshjes për kufijtë detar me Libanin.
Top Channel
