Zëvendëskryeministri i parë dhe kandidati i VLEN-it për kryetar të Komunës së Çairit, Izet Mexhiti, ka reaguar ndaj deklaratave të kandidatit të BDI-së i cili ka thënë se “VLEN një ditë para zgjedhjeve do t’i blejë votat në Çair”.
Mexhiti, në një pronocim për media gjatë takimit me sportistët nga Komuna e Çairit, ka theksuar se me këtë gjuhë fyese, Osmani jo vetëm që i nënçmon banorët e Çairit, por edhe vetveten e demaskon, duke pranuar përvojën e tij dhe të partisë, e cila ka ndërtuar pushtetin mbi blerjen dhe keqpërdorimin e votës.
“Çfarë nënkupton kjo? Që ai i ka blerë votat për BDI-në? Është qesharake dhe e pa kuptueshme si një ish ministër nuk është mirënjohës ndaj votuesve të Çairit, të cilët për vite i kanë dhënë besimin”, deklaroi Mexhiti.
Ai shtoi se votuesi i Çairit është i mençur dhe dinjitoz, nuk blihet e as nuk shitet, dhe këtë herë, më 19 tetor, do të ndëshkojë arrogancën dhe përbuzjen.
I pyetur nga gazetarët lidhur me rastet e korupsionit të kundër kandidatit të tij, Mexhiti kujtoi rastin “Pacineti” i hetuar nga Prokuroria speciale e mbështetur nga ndërkombëtarët, si dhe keqpërdorimet e konstatuara nga Enti Shtetëror i Revizionit për organizimin e Samitit të OSBE-së.
“Gjykata speciale e formuar nga ndërkombëtarët në bashkëpunim me institucionet vendore, ka trajtuar edhe rastin ‘Pacineti’ i cili lidhet me spitalin e grave në Çair dhe me spitale të tjera. Po ashtu, Enti Shtetëror i Revizionit, si institucion i pavarur ka konstatuar parregullsi dhe keqpërdorime, si në rastin e organizimit të Samitit të OSBE-së. Në raste të tilla, Prokuroria është e obliguar të veprojë”, ka theksuar Mexhiti duke u përgjigjur në pyetjen e gazetarëve.
