Heqjen e Balancuesit e ka komentuar edhe zyra e Delegacionit të Bashkimit Evropian në Shkup.
Nëpërmjet një njoftimi drejtuar mediave, Delegacioni i BE-së e thekson rëndësinë e zbatimit të Marrëveshjes së Ohrit, ndërsa thonë se po presin se cila do të jetë zgjidhja e përfaqësimit të drejtë pas shfuqizimit të Balancuesit si mekanizmi i vetëm që ishte për ndalimin e majorizimit të etnive joshumicë gjatë punësimit në institucionet e shtetit.
“Theksojmë rëndësinë e zbatimit të vazhdueshëm të Marrëveshjes Kornizë të Ohrit, e cila kërkon respektimin e plotë të parimit të mosdiskriminimit dhe trajtimit të barabartë, veçanërisht në administratën publike”, thonë nga Delegacioni i BE-së në Shkup.
Është në dorën e autoriteteve maqedonase që të sigurojnë respektimin e parimeve, thuhet në njoftim.
“Vendimi i Gjykatës vjen pasi qeveria njoftoi synimet e saj për të reformuar sistemin dhe për të zëvendësuar Balancuesin. Presim të shohim propozimet”, kanë thënë nga Delegacioni i BE-së në vend.
