Pushtimi rus i Ukrainës do të ndikojë në të gjithë ekonominë globale duke ngadalësuar rritjen dhe duke rritur inflacionin, dhe mund të riformojë ndjeshëm rendin ekonomik global në afat të gjatë, ka thënë Fondi Monetar Ndërkombëtar (FMN).
“Përtej vuajtjeve njerëzore dhe flukseve historike të refugjatëve, lufta ka rritur çmimet e ushqimit dhe energjisë, ka nxitur inflacionin dhe ka gërryer të ardhurat, ndërsa ka ndërprerë tregtinë, zinxhirët e furnizimit dhe dërgesat në vendet fqinje të Ukrainës”, thuhet në deklaratën e FMN-së.
Kjo, sipas FMN-së, po gërryen gjithashtu besimin e biznesit dhe po shkakton pasiguri të investitorëve që do të ulë çmimet e aseteve, do të shtrëngojë kushtet financiare dhe mund të shkaktojë dalje të kapitalit nga tregjet në zhvillim, thuhet në raport.
“Konflikti është një goditje e madhe për ekonominë globale që do të dëmtojë rritjen dhe do të rrisë çmimet,” tha FMN.
Zyrtarët e FMN-së kanë thënë tashmë se presin të ulin parashikimin e mëparshëm të Fondit për rritjen ekonomike globale prej 4.4 për qind në vitin 2022. FMN do të publikojë parashikimet e përditësuara më 19 prill.
