www.telegrami.mk
Vendimi për emrat e rrugëve në Tetovë ka nxjerrë në pah një realitet të hidhur: pas dy dekadash, asnjëra palë politike nuk mund të lahet nga përgjegjësia. Në vend të zgjidhjeve institucionale, qytetarëve u janë servirur deklarata politike, akuza të ndërsjella dhe patriotizëm sezonal.
Nëse dokumentacioni i nevojshëm nuk është siguruar që nga viti 2007, atëherë përgjegjësia nuk mund të hidhet vetëm mbi ata që qeverisin sot. Gjatë këtyre viteve, në Komunën e Tetovës, në Qeveri dhe në institucionet shtetërore kanë kaluar shumë struktura politike, shqiptare dhe maqedonase. Askush nuk u kujtua të mbyllte përfundimisht këtë çështje dhe ta siguronte bazën ligjore që emrat e rrugëve të mos viheshin më në diskutim.
Nga ana tjetër, edhe qeverisja aktuale nuk mund të fshihet pas arsyetimit se problemi është i trashëguar. Kur një çështje me rëndësi identitare dhe simbolike për qytetarët vjen para institucioneve, detyrë e çdo pushteti është të shfrytëzojë të gjitha mjetet ligjore dhe administrative për ta mbrojtur interesin publik. Heshtja, neglizhenca ose mungesa e reagimit nuk mund të paraqiten si sukses.
Më shqetësues është fakti se emrat e rrugëve po shndërrohen në armë politike sa herë afrohen përplasjet partiake. Kur janë në opozitë, partitë bëhen mbrojtëse të kauzave kombëtare; kur janë në pushtet, shpesh harrojnë premtimet dhe kujtohen vetëm kur shpërthen ndonjë krizë.
Qytetarët e Tetovës kanë të drejtë të pyesin: ku ishin institucionet për gati 20 vjet? Kush duhej të siguronte dokumentacionin? Kush duhej të garantonte zbatimin e procedurave ligjore? Dhe pse kjo çështje u la të zvarritej deri në pikën ku sot secila palë akuzon tjetrën?
Në fund, problemi nuk është vetëm te emrat e rrugëve. Problemi është te kultura politike e mungesës së përgjegjësisë. Kur të gjithë kërkojnë fajtorin te kundërshtari dhe askush nuk pranon pjesën e vet të fajit, humbësit e vetëm mbeten qytetarët.
Tetova nuk ka nevojë për patriotizëm me afat zgjedhor, por për institucione që kryejnë punën e tyre në kohë. Pas 20 vitesh, është e vështirë të besohet se kemi të bëjmë vetëm me një gabim administrativ. Kjo histori është pasqyrë e një politike ku përgjegjësia humbet, ndërsa faturën e paguajnë qytetarët…www.telegrami.mk
Mesut Shabani
