Në shkollën “Hasan Prishtina” në Çair, kandidati për Kryeministër i nominuar nga BDI-ja, Naser Zyberi dhe bartësi i listës së zonës 2, Arbër Ademi, u takuan me mësues dhe arsimtarë, për të dëgjuar nevojat e tyre dhe për të diskutuar se si mund të përmirësohet cilësia e arsimit dhe veçanërisht barazia në arsim.
“Plani im i veprimit gjatë 100 ditëve të para si Kryeministri shqiptar përfshin zotimin që parasheh një ardhmëri më të mirë për rininë sonë. Ne do ta bëjmë arsimin parashkollor të detyrueshëm dhe do të ofrojmë kopshtet për fëmijë në çdo komunë”, theksoi Naser Ziberi, duke shtuar se edukimi i detyrueshëm parashkollor garanton arsim të barabartë për të gjithë fëmijët pavarësisht gjendjes së tyre sociale dhe gjithashtu ndihmon familjet e reja, gjë që është vërtetuar shkencërisht, se arsimi parashkollor kontribuon në karrierën arsimore të fëmijëve dhe ul hendekun shoqëror.
Kandidati për kryeministër shtoi se investimi më i rëndësishëm që ai synon është rritja e pagës minimale për mësuesit dhe arsimtarët në 600 euro.
Ndërkaq gjatë kësaj vizite bartësi i listës së zonës dy, Arbër Ademi, tha se do të investohet në infrastrukturën arsimore, në ndërtimin dhe rinovimin e kopshteve dhe shkollave në lagjet shqiptare, projekte të cilat disa prej tyre veç më janë në realizim e sipër.
“Të ndërtojmë një infrastrukturë të barabartë, shkolla dhe kopshte bashkëkohore, edhe në lagjet që kanë mbetur pas sa i përket infrastrukturës për shumë vite”, theksoi Ademi.
Kandidati për Kryeministër, Naser Zyberi, u zotua se një masë tjetër e rëndësishme e 100 ditorit të parë është zbatimi i detyrueshëm i gjuhës shqipe nga klasa e pestë.
