Duke folur për përditësimin e listës së zezë amerikane në Maqedoni, respektivisht pas vendosjes në këtë listë të Artan Grubit dhe Enver Bexhetit, ambasadorja amerikane në vend, Angela Aggeler tha se duhet kujtuar se simboli i drejtësisë, përveç syve të mbyllur dhe peshores, ka në dorë edhe shpatën, që simbolizon përgjegjësinë ndaj atyre që tentojnë ta pengojnë të njëjtën, përcjell TV21.
“Nën ligjet e SHBA-ve, duhet të emërojmë personat, për të cilët ka dëshmi se janë të përfshirë në korrupsion domethënës dhe të dëmshëm, pavarësisht rolit të tyre në të kaluarën apo në të tashmen. Thuhet që drejtësia është e verbër, sepse duhet të jetë e paanshme dhe objektive për të gjithë, pavarësisht partisë politike, gjinisë, sfondit etnik apo pozitës. Dhe kujtoni që edhe pse mban një peshore, për të matur të vërtetën kundër gënjeshtrës, gjithashtu mban shpatën, për t’i mbajtur përgjegjës, ata që tentojnë të pengojnë atë”, tha Aggeler.
