Kreu i shërbimit informativ të Greqisë dhe sekretari i përgjithshëm i zyrës së kryeministrit kanë dhënë dorëheqjen, mes akuzave për përdorimin e paligjshëm të sistemit të përgjimit kundër një gazetari dhe ndaj kreut të një partie opozitare.
Zyra e Kryeministrisë së Greqisë bëri të ditur se drejtori i Shërbimit Informativ Kombëtar Panagiotis Kontoleon dhe Grigoris Dimitriadis, sekretar i përgjithshëm i zyrës së kryeministrit, dorëzuan të premten, më 5 gusht dorëheqjen e tyre, e cila u pranua.
Kontoleon dha dorëheqjen “pas veprimeve jo korrekte të konstatuara në procedurën e mbikëqyrjes ligjore”, tha zyra e kryeministrit, pa dhënë detaje se cilat procedura u ndoqën në kundërshtim me ligjin ose cilët mund të kenë qenë objektivat e këtyre përgjimeve. Sipas ligjit grek, një prokuror kërkohet të aprovojë çdo përgjim t ndërmarrë nga shërbimet informative.
Zyra e kryeministrit nuk dha arsye për dorëheqjen e Dimitriadis. Një zyrtar qeveritar tha se “kishte të bënte me klimën toksike që ishte krijuar rreth tij. Në asnjë rast nuk ka të bëjë me sistemin e përgjimit “Predator”), me të cilin as ai dhe as qeveria nuk janë të lidhur në asnjë mënyrë.” Zyrtari foli në kushte anonimiteti pasi arsyet e dorëheqjes nuk ishin bërë të ditura.
