Nëse Maqedonia e Veriut nuk e pranon propozimin francez, Shqipëria duhet të vazhdojë vetë, gjë që mendoj se është e drejtë, por shpresoj se kjo nuk do të jetë e nevojshme, tha kryeministri holandez Mark Rutte pas takimit të djeshëm me kryeministrin shqiptar Edi Rama. raportojnë mediat.
Rutte shprehu optimizëm se Maqedonia e Veriut do ta pranojë propozimin francez dhe nuk do të ketë nevojë të ndahen dy vendet në rrugën e tyre drejt BE-së.
“Në samitin e Ballkanit Perëndimor të mbajtur në Bruksel, BE rikonfirmoi angazhimin e saj. Sa i përket vërejtjes së Edi Ramës më pas, mendoj se kishte të drejtë – nuk ishte një takim i suksesshëm. Duhet të bëjmë më shumë. Ne e dimë se vendet e Ballkanit Perëndimor, përfshirë Shqipërinë, po punojnë fort për t’u anëtarësuar në BE dhe Shqipëria ka mbështetjen e plotë të Holandës. Problemi këtu është Maqedonia e Veriut dhe falë përpjekjeve franceze, ka një moment të ri në procesin e anëtarësimit që prek edhe Shqipërinë, në mënyrë që të dy vendet, të paktën politikisht, të lidhen. Ne mbështesim propozimin francez për heqjen e pengesave që bllokojnë Maqedoninë e Veriut dhe Shqipërinë në procesin e anëtarësimit. Propozimi ofron zgjidhje për të gjitha shqetësimet e mbetura”, vlerësoi ai.
Ai shtoi se BE-ja do të vazhdojë të mbështesë Maqedoninë e Veriut në hapat e ardhshëm nëse pranon propozimin francez.
“Maqedonia e Veriut ka bërë shumë, ka ndryshuar edhe emrin. Ekziston një optimizëm se Maqedonia e Veriut do ta pranojë kompromisin francez dhe i bëj thirrje që ta pranojnë sepse është një kompromis i drejtë. Të gjithë fitojnë diçka, humbin diçka, por të paktën është një rezultat i drejtë. Të shpresojmë se Maqedonia do të pajtohet dhe pastaj të gjithë do të mund të ecim dorë për dore në të ardhmen”, theksoi Rute.
Sipas tij, caktimi i datës për mbledhjen e parë ndërqeveritare do të jetë një shpërblim për qeverinë shqiptare të Edi Ramës dhe për reformat që po zbaton.
“Do të jetë gjithashtu një shpërblim i drejtë për gjithë punën që ka bërë qeveria e Edi Ramës dhe reformat që ka ndërmarrë, të cilat i pashë me sytë e mi gjatë vizitës sime në nëntor kur isha në Tiranë”, tha ai.
Nga ana e tij, Edi Rama vlerësoi lart angazhimin e Holandës dhe falënderoi kryeministrin Rutte për nxitjen e procesit të anëtarësimit në BE. Të dy mbështetën idenë e krijimit të një komuniteti të ri politik. Madje Rutte foli edhe për një nismë shqiptaro-holandeze për të udhëhequr procesin.
